› 選擇地區
三藩市
紐約
洛杉磯
其他美國地區
香港 台灣 北美
 
2015年06月30日

【七筆思議】
詩與胡說:喂,其實,我真係儍㗎。 - 何韻詩

一開始大家戰戰兢兢,又驚俾人趕又剩;生手嘅我們,細聲拜拜,路人零理,一班人大聲一齊拜,人哋又以為你哋玩嘢,繼續零理。

計劃下半年project「十八種香港」campaign中。畢總監話,想拍一條片,試試香港人究竟仲有冇溫度,要我哋落港鐵,同陌生路人狂拜拜,睇吓有咩反應。一般歌手聽到咁嘅快閃行動,肯定即時快閃走咗,但瘋狂總監遇着黐線歌手,我一聲:「好!做!」,轉眼間,一群更儍更癲嘅團隊已經置身港鐵中。
香港地,太多冷氣,又多怨氣,尤其港鐵車廂內外,唔係鬧交,就係打交;大家趕頭趕命,三九唔識七鬼得閒同你打招呼咩?搞個咁嘅行動,要有心理準備俾人當黐線。但,又如何?諗深一層,講聲拜,say個hi啫,又有幾黐線呢?小朋友第一樣學嘅,唔係就係講hello同byebye咩?根本最癲嘅係,呢個城市已經冇人再會咁做,會做嘅已變成異類。香港係咪真係只剩冷漠?

戰戰兢兢 細聲拜拜

我哋死唔信邪,一行二十幾人,出發。一開始大家戰戰兢兢,又驚俾人趕又剩;生手嘅我們,細聲拜拜,路人零理,一班人大聲一齊拜,人哋又以為你哋玩嘢,繼續零理。調整策略,大夥兒發現竅門,眼睛必須同對方對上,用眼神表達誠懇,形成一種連接,你堅持到五秒,乘客通常有回應。
再次出發,調整過後,漸見迴響。最可愛係叔伯們,冷漠到熱情嘅時差好短,即使面部表情依然欠奉,手指頭都會忍唔住畀少少反應你,小朋友就更直接單純。如你有睇過呢條片,你會明白我所講,香港人,絕非只剩冷漠,欠缺的,可能只係一點點連接,一點點鼓勵。
「十八種香港」,起源為某天,睇到自己被內地封殺嘅新聞,忽發奇想:既然被封殺,既然去唔到內地做巡演,咁點解唔可以就喺番香港,做個香港巡演?香港都有人,香港人都需要娛樂,難道香港歌手單靠香港真係生存唔到?我人生最討厭就係人哋同我講「唔得」,簡直係「意志開關」一樣。咩叫唔得?我就唔信唔得!一不做二不休,乾脆嚟個十八區巡演。

社區實驗 凝聚力量

開始做場地research,無意間接觸到一堆新朋友,年輕嘅老一輩嘅,全部都係香港有心人,都希望用自己方法,喺自己嘅空間努力創造另一些可能性。我慢慢發現,有相同理念嘅人十分多,惟各自各做,力量無辦法集中起來。然後,我意識到,呢個project,根本唔只係一個個人巡演,而應該係一個集體社區實驗。
「十八」,起點為香港十八區,但亦可以解讀為十八般武藝,18ways of life。香港本應是個擁有無限可能的地方,集合中西方的最長處,只是不知從何時被規限了,個性被沖淡了。現時香港,可謂身處最狹窄的年代,做任何事好似都只有一個方法:抗爭如是,唱歌如是,拍戲如是,甚至表達自己也如是。網絡令大家接上,但亦容易被批判,只要持有不一樣嘅聲音,瞬間就會被歸類為某一種人,此風向極不健康,單一只會令所有創意細胞慢慢被殺死。
港鐵拜拜實驗話畀我哋知,香港人嘅溫度仍健在,我哋熱情還未完全減退。可能只需要一點鼓勵,一個微笑,令大家重新連接起來。此刻的我們,需要更多可能性,需要更多不同方法和想像。

飛身加入 延續行動

未來半年,我將會聯同我充滿魄力嘅團隊,走到香港各地各區,舉行大大小小的演出和地區體驗。將會有挑戰自己,首次以獨立音樂品牌主辦嘅大型演唱會;亦會走進小店和工廠、農地和郊區,將有心有力嘅香港人,重新連接起來,重新描繪一個被遺忘了的香港。
呢個計劃,有點瘋癲,有點儍,但我從來就係鍾意做別人認為無用嘅事,同時慶幸有一班比我更儍嘅人已經飛身加入。不過又咁,有時,有用無用,唔係單憑你口講,單憑冷嘲熱諷就可以下定論。覺得有用就去做,總比坐喺度乜都唔做有用。總會有人被你熱情感染,然後將行動延續落去。
呢個係個一個人無法完成嘅挑戰,誠邀你加入,同我哋一齊為香港重新種植情感、種植溫度,為漸漸變得單一嘅地方,翻出25種微笑,36種溫度,一萬種想像。
十八種香港,無限種可能。

詩與胡說

撰文:何韻詩

野生菇一粒,活在娛樂圈邊境的自由人。
從音樂起步,卻意外地透過創作與生活,看到生命的可能性。
「希望」與「公義」就是自己的信仰。

fb連接 http://www.facebook.com/hocchocc

本欄逢周二刊登

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載