› 選擇地區
三藩市
紐約
洛杉磯
其他美國地區
香港 台灣 北美
 
2015年08月08日

激罕孖空姐老婆拍拖
65歲松哥冧爆

65歲嘅松哥劉松仁,92年迎娶比自己細廿年嘅空姐蘇嘉燕之後,仍然不時被拍得同其他女伴撐枱腳逛名店,上月又被拍到同大班靚太到大埔郊遊。報道仲話佢同其中一位紮起馬尾、貌似馬賽嘅闊太特別好傾,郊遊之後松哥仲同呢位疑似闊太撇低同行朋友,去咗九龍塘會會所繼續約會。事後松哥直斥報道無中生有:「講多無謂,一切都會過去的。時間可以證明一切。」

松哥同蘇嘉燕係喺飛機上結識,拍拖數月即閃電結婚,婚後劉太相當低調,松哥亦非常體貼0架,日夜管接管送,仲要落街買鑊兼陪睇中醫,來回機場送老婆返工,盡現溫柔;而雖然松哥不乏花邊新聞,但劉太對其非常有信心,繼續俾佢自由度同異性約會。

今日呢,松哥就唔陪朋友,專心一意陪太太,一齊去圓方睇《職業特工隊:叛逆帝國》。下晝5點40分左右,松哥同太太抵達圓方,一路行一路傾,腰間繫住腰bag嘅松哥笑容滿面。兩人一早訂咗飛,睇到7點半左右一齊走。因為散場時好多人,松哥亦特別戴超,同太太保持前後腳,繼續low profile。

睇完戲,有啲餓,落下一層拎飛食意大利嘢,但成十幾人等,太太就話不如去第二間食啦咁,於是兩人去咗隔籬間cafe食pizza飲咖啡,太太仲好貼心咁,幫老公碟薯條唧茄汁,而松哥就專心鋸扒。

食完之後,松哥就變低頭族,密密篤手機;太太食飽之後,都篤咗陣,無聲勝有聲。到臨走前嘆杯啡,兩人終於傾下偈談心,由松哥埋單簽卡走人,再去客戶服務櫃枱蓋飛free parking,然後就車太太走喇。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載