› 選擇地區
三藩市
紐約
洛杉磯
其他美國地區
香港 台灣 北美
 
2015年08月24日

恒生後人求學位爆辛酸
何倍倩大仔升小一 考足15間

開心的暑期快結束,學生們要準備開學嘞!但不少星級父母最緊張是子女能考入哪間學校,別以為有錢、有地位可以輕鬆讓子女入讀心儀學府,恒生新抱36歲的何倍倩,其五歲長子阿正,升讀小一都要過五關斬六將。何倍倩前日在金鐘受訪時,透露先後為兒子報名15間學校,五歲人仔要考兩個半小時筆試,還要在逾千人中爭取不足一百個的入學名額,她直言:「真係嚇親我!」

相關新聞:【入學貼士】何倍倩逆思考攻略

教育決定下一代知識、思想和價值觀,最近有家長不滿香港填鴨式教育,申請要求兒子「在家學習」,各界議論紛紛。不少星爸星媽都是「緊張大師」,有傳劉德華囡囡劉向蕙八個月便返playgroup,應采兒囝囝「小春子」Jasper剛滿兩歲便要返學前班,郭可盈囡囡林天若被爆分別返上午班和下午班兩間幼稚園,但原來緊張子女選校確實要從未出世開始。恒生已故創辦人之一何善衡男孫何乃斌與太太何倍倩育有五歲大兒子阿正,及一對兩歲龍鳳胎阿宏和阿之,何倍倩前日在金鐘香格里拉酒店接受訪問,大嘆為子女選校後知後覺。

「考兩個半鐘筆試」

何倍倩說:「當我小朋友一歲嘅時候,我仲施施然諗住幫佢哋搵幼稚園,校方話可以先入讀佢哋開嘅playgroup,咁我報名啦,點知要waiting list,話我應該喺小朋友一出世或懷孕時已經要入form,我問『吓,咁㗎?我咪遲咗成年?』一間都算,原來間間都係咁,真係嚇親我!」
大部份家長特別緊張子女的小學派位,何倍倩亦為替兒子選傳統學校或國際學校費盡心思,先後向15間學校遞交入學申請表,她說:「五歲人仔,就要入去考兩個半鐘頭筆試,要不斷寫都幾驚。但冇辦法,因為學校考你,唔止考你小朋友,仲要睇你讀邊間幼稚園,如果本地學校仲麻煩,要玩計分,睇你嗰間要係天主教定乜嘢教、又要睇係咪舊生或住嗰區,甚至攞乜國家戶籍都有關。」她直言即使有錢都未必有學位,她苦笑謂:「通常報名後都會有講座,去每間學校都嚇親我,做乜人山人海,望落去有千幾人,但只有少過一百人入到,要脫穎而出真係好艱難。我有朋友為幫小朋友考國際學校,曾經買咗幾百萬債券,但最後都未必入到。」
傳統學校和國際學校各具優點缺點,何倍倩認為要視乎小朋友性格:「我細個讀瑪利諾,老師叫做乜都唔敢say no,所以小朋友會好乖同好有規律,之後我去外國讀high school,起初會唔適應,因為好鍾意群體學習,會迫使我creative多啲。」

相關新聞:【國際名牌】蔡少芬千嬅各有心水

不贊成家中學習

問到兒子最終選了甚麼學校?何倍倩說:「揀咗國際學校,所以幾日前已經開咗學。其實我都有問過佢,睇佢偏向邊樣,首先唔好諗住一定要入最top名校,應該調番轉揀一間畀小朋友讀得開心、令佢可以100%自然學習嘅學校,咁就會好似海綿咁吸收。我亦唔贊成小朋友上太多興趣班,因為物極必反,小朋友可能會反叛唔讀書。」她更不贊成「家中學習」,她解釋:「除讀書外,學校生活仲係另一個途徑教小朋友良好社交關係,係將來出嚟做嘢一個小影子。」
採訪:羅慧敏
攝影:仇志德

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載