› 選擇地區
三藩市
紐約
洛杉磯
其他美國地區
香港 台灣 北美
 
2015年09月27日

新歡舊愛約埋夜蒲
樂基兒鏟青男貼頭談心

【中環】
樂基兒(Gaile)同黎明離婚之後感情生活依然精采,舊年佢同新西蘭籍嘅Denim Mchardy分手之後,上個月又被發現識咗個鏟青男新歡。啱啱拍拖,就梗係愛得難捨難離啦,所以近排經常見到Gaile孖住新歡四圍去。好似日前夜晚呢對孖公仔又出動,Gaile同鏟青男友去到中環蘭桂坊酒店一間夜店尋開心,而最估唔到嘅係,Gaile重約埋前度男友、夜店Volar老闆吳承浚,以及舊愛嘅現任外籍女友一齊happy!

男友盡興狂歡

當晚11點幾,Gaile已經喺夜店出現,身邊除咗鏟青男新歡之外,重有舊愛吳承浚同外籍女友以及幾個朋友,雖然Gaile同舊愛一人坐一邊,但新歡舊愛成枱人都有交流傾偈,只係大部份時間Gaile都係孖住同鏟青男友咬耳仔開心笑,吳承浚見到Gaile笑得咁開心,都笑埋一份,似乎戥Gaile搵到個伴開心咁款。
其實成晚Gaile冇乜點飲酒,反而佢新歡就成晚飲個唔停,有時仲主動撩朋友碰杯㖭!不過,鏟青男友同朋友social之餘,都有照顧女友,好似Gaile去洗手間,鏟青男都特登陪住女友。而當晚Gaile同男友坐到凌晨點幾鐘就齊齊走先,鏟青男搭𨋢時好似發現有記者偷拍,仲挺胸想幫女友擋鏡頭,然後孖住搭的士返歸。
採訪、攝影:陳辰、楊浩賢、潘冠恩

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載