› 選擇地區
三藩市
紐約
洛杉磯
其他美國地區
香港 台灣 北美
 
2015年11月23日

開騷爆廣東話笑彈
CNBLUE「男神女神」冧港迷

鄭容和全晚high爆,不時用半鹹淡廣東話引起爆笑。

韓國樂隊CNBLUE幾乎年年來港開騷,他們更可以堪稱是講得最多廣東話的韓星,而前晚他們為一連兩晚於香港亞博館的演唱會打響頭炮,四子全程用半鹹淡廣東話及英文跟粉絲溝通,主音鄭容和更將鍾意香港的心情唱出來,成功出招冧掂港迷。另一邊廂,女團少女時代(少時)同樣在前日起舉行一連兩場的首爾演唱會,兩大天團隔空鬥人氣。
CNBLUE於前晚的頭場演唱會中分別唱出《孤獨的人》、《Cinderella》等約20首歌,主音鄭容和全晚紮紮跳,掟毛巾給歌迷、用歌迷相機自拍、唱到瞓地等,再配合舞台的煙花及噴火效果,兩小時的演出氣氛非常熱烈。四子幾乎年年來港,似乎已將香港當成另一個家,鼓手姜敏赫一開波就施冧功:「我好掛住你哋。」鄭容和全晚講得最多廣東話,例如「你係我嘅女神,我係你嘅男神。」又說「左邊」、「右邊」,問歌迷好不好玩,不過由於廣東話發音唔鹹唔淡而引來爆笑。
到安哥時,鄭容和手拎飲品出場,講兩句就飲一啖,認真識嘆。之後鄭容和為答謝港迷而作了首歌,邊彈琴邊唱:「Oh my Hong Kong,多謝晒,Oh my Hong Kong baby。」當全唱大合唱《愛情光》時,因港迷唱到一嚿嚿,鄭容和即露出古怪表情,不過之後連他自己也唱錯,搞到要尷尬掩面。完騷前鄭容和承諾會再來香港,又用廣東話說:「如果我嘅廣東話可以再講得好啲,咁我就可更好表達我嘅心情。如果我嘅music可以帶畀大家energy,咁就係大家畀我嘅最好禮物。」

少時記招晒長腿

另外,少時前晚在首爾奧林匹克公園舉行頭場演唱會,昨午成員穿上黑色短裙套裝現身記者會,大晒一雙長腿,當中孝淵以一頭粉藍色的造型搶鏡。而在前晚演唱會,少時亦十分落力演出,並不時賣萌冧粉絲互動,當徐玄提議大家一齊跳洗頭舞時,孝淵竟然語出驚人問:「大家都常洗頭對吧?」搞到Sunny笑不停,之後孝淵發覺自己問錯問題,即與Sunny一起儍笑。
採訪:梁婉霞

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載