› 選擇地區
三藩市
紐約
洛杉磯
其他美國地區
香港 台灣 北美
 
2015年11月23日

【馮仁昭四圍超】
約栢芝雯女行街 衛詩腩凸出

三個女人一個墟,加多個當然更加不得了。講緊嘅係張栢芝、鄧萃雯、張文慈同埋衛詩四位基督徒。佢哋4個好姊妹噚日下晝約埋一齊去銅鑼灣購物,栢芝、雯女同張文慈三個都係dry爆一族,感情未有着落,係得衛詩有個男友仔阿Tim。
不過,噚日衛詩撇低男友陪姊妹行街,完全冇話重色輕友。之但係,唔知衛詩呢排係咪開心得滯搞到心廣體胖呢,噚日着住黑色鬆身tee嘅佢,睇嚟發福好多,尤其佢叉腰嗰陣,成個肚腩凸晒出嚟,至於雯女同張文慈亦脹脹哋,係得栢芝身形keep得好。

周街自拍兼吹水

其實噚日下晝4點幾見佢哋嗰陣,栢芝已經挽住兩個膠袋啱啱買完嘢。四個女人邊行邊開心吹水,傾傾吓,仲周街玩自拍,真係好港女feel。雖然栢芝又戴帽又戴黑超,但依然有途人認得,仲搵佢影相,心情大靚嘅栢芝完全冇托手踭。之後四人行去珀麗酒店攞車,栢芝臨走仲逐個擁抱,真係姊妹情深。原來之前一日,雯女同張文慈兩位中女已經相約喺中環嘆下午茶,食飽後仲行街舒展筋骨,但行足一粒鐘都係冇收穫。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載