蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年11月27日

自揭悲慘經歷 警醒少女
FFx Shirley18歲拍私影遭性侵

由四位成員楊澤怡(Shirley)、李詩詠(Ceci)、潘穎琳(Mizaki) 及周葆諭(Christy)組成的女子組合FFx,早前憑合唱歌《Sugar Baby》廉價MV忽然爆紅,惜同時遭網民恥笑騎呢,甚至用粗口問候,但原來笑聲背後,四位成員各有坎坷故事。幼時父母離異,要入住兒童之家及半工讀賺錢的Shirley,加入FFx前為養自己拍私影,Shirley昨日接受本報獨家訪問時更泣不成聲自爆:「我俾人性侵犯咗!」

相關新聞:唔熟唔呃:遭前度騙財兼襲擊

現年21歲的楊澤怡是四人女子組合FFx成員之一,FFx早前憑合唱歌《Sugar Baby》MV紅爆網絡,連帶四位成員人氣急升,而且頗受學生歡迎,多間大學都邀請她們演出,Shirley更被封為「大學女神」,惟本報日前獲得一批Shirley早年拍下的性感私影照,包括她只戴胸圍及穿內褲擺各種誘人甫士,以及一輯她背面的全裸照,與現在走「女神」形象的她兩走極端。

一直影開比堅尼

關於這輯「肉」照,Shirley昨日在經理人Sam陪同下接受《蘋果》獨家專訪,全程強忍淚水的Shirley於訪問完畢後,一度泣不成聲,又自責愚蠢,她說:「其實呢件事埋喺心入面三年,今日講咗出嚟個心都舒服咗。」
Shirley續說:「由中三開始就住兒童之家,一直住到我有學校宿舍,因為住兒童之家入面嘅青年宿舍要交租,加上返學都要用錢,所以一直好努力搵錢幫補支出,有同人補習,但始終都係唔夠,所以17、18歲開始去幫人拍私影,影比堅尼每個鐘大約有三百蚊,一向冇影裸體,只係得嗰次。」
事隔三年,Shirley憶述當日的事仍然緊張,不時全身抖震,她說:「幫我影相嗰個X先生,本來係話同我影比堅尼相,影完一陣佢畀本相簿我睇,入面都係一啲模特兒影嘅裸體照,佢問我可唔可以擺同樣嘅甫士影一輯,本來我唔想,但因為佢未畀錢我,而且佢話可以加到500蚊一個鐘,我又真係等錢用,所以就應承咗影,到差唔多影完,呢個X先生就推我落床,佢性侵犯咗我……當時我好驚,我想走同不停大嗌唔好,我有推開佢、有反擊,但反擊唔到,我係咁喊,之後我即刻着番衫衝出門口走。」

相關新聞:為錢勞累:3/4成員家庭破碎

犯規怕入女童院

據知,當年Shirley並沒有報警,她解釋:「我拍私影係犯咗青年宿舍嘅規矩,如果報警我就要去女童院,所以我唔敢講出嚟。」Shirley又說:「我諗番知道自己好蠢,𠵱家講出嚟希望提醒有幫人拍私影嘅女仔要小心,要保護自己。」
問Shirley之後有否再跟X先生見面?她承認兩個月前見過對方:「佢其實一直都有喺WeChat約我出去,我當然冇出,回覆都係推佢,直到之前知道佢入咗娛樂圈做幕後,我真係好驚,早排佢約我出嚟食飯見面,我應承佢出嚟,因為我想叫佢刪除啲相同埋唔好同人講,當時佢答應咗,我都覺得自己蠢,佢一直都呃我。」
採訪:李察
攝影:林德雄

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載