› 選擇地區
三藩市
紐約
洛杉磯
其他美國地區
香港 台灣 北美
 
2015年12月21日

邱德根孫女生日 超蓮行暗巷趕兩場

【蘇豪】賭王三房千金何超蓮同吳克羣分手後,即又傳出霍震霆二公子霍啟山想追佢,真係唔憂冇拖拍,但佢甩拖後大部份時間都係同班女性朋友姊妹淘多。前晚,超蓮就連走兩場,9點幾先到中環蘇豪區,身穿灰色衞衣、黑短裙嘅佢陪住兩名女性友人喺麵店食麵,超蓮就冇點食物,只係專注同友人傾偈。
超蓮先行獨自離開,沿途佢選擇由街市、暗巷咁行落中環,當佢經過街市時見到有婆婆推木頭車,即泛起愛心想上前幫手,點知畀其他途人搶先一步。之後,佢行到大街見到有傷殘人士表演音樂,佢即刻捐錢支持,後來佢越行越急,原來約咗吳千語一齊去置地廣場一間餐廳,幫邱德根孫女邱詠麒慶祝生日,同場仲有賭王四房嘅超盈,超盈去到時已經成11點。

千語讚峯峯「機王」

此外,千語噚日喺深水埗出席手機遊戲宣傳活動,佢大讚男友林峯係「機王」:「佢好叻打online game,可以問吓佢,我都有打機,係一個樂趣,啲報道成日話佢send message畀我,其實佢部機打橫係打緊機。」活動司儀喺台上以「玉樹林峯」形容千語男友,千語就笑言:「唔知,好痹,有內涵緊要啲,佢有耐性,對朋友、屋企都好好,對我都好。」而同場嘅楊鎧凝(Celine)妹妹就話冇因為早排寫真風波影響,少咗工作而唔開心,問佢會唔會再拍寫真,佢話:「我都唔知,睇吓媽咪。」
採訪:梁繼光、張俊銘
攝影:潘冠恩、陳順禎

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載