蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月21日

自詡做到特首創辦fb
阿叻港豬偉論遭插爆

陳百祥(阿叻)前晚在港台節目《我係乜乜乜》發表一連串「偉論」,指大部份網民「讀壞書、憎人富貴厭人窮」,又指黃之鋒考到「12個A就話你叻」等等,觸發網上洗版式狂插。阿叻讚特首梁振英表現佳,更稱:「呢個國家唔係你嘅,唔係你打出嚟嘅呢個天下。」唔少藝人睇唔過眼,黃秋生、何韻詩等齊齊在fb嘲諷阿叻,秋生留言:「國家唔係你嘅都講得出!」

相關新聞:【精采留言】網民寸爆反擊

稱自己正氣「祥」存的陳百祥近年不時向網民挑機,前年為「跪回家」事件斥責網民是狂妄的「妄」。阿叻接受港台《我係乜乜乜》的訪問前晚播出街,短短20分鐘片段,再度惹起新一輪網上罵戰!

「我從冇話過我叻」

兩位主持人分別是被稱為新一代「男神」的麥嘉緯及著名女作家王迪詩,當晚節目以「港豬」為題,阿叻揚言大部份網民「讀壞書」、憎人富貴厭人窮;如果自己「後生啲」,可能是facebook創辦人,又指如果自己是「90後」,便有機會做特首。主持人向阿叻提問一連串時事熱話,如問他是否知道誰是饒戈平(基本法委員會委員),阿叻稱不懂政治,卻在節目中批評社會運動;又讚特首梁振英政府表現佳,只是批評者「冥頑不靈」,他說:「佢哋成日覺得(特首)唔係佢哋選出嚟嘅,係689人選出嚟㗎?所以佢哋條氣唔順……你接唔接受都冇用,因為呢個國家唔係你嘅、唔係你打出嚟嘅呢個天下。」引發網民洗版式狂插。
昨日記者聯絡阿叻,他在電話中繼續力撐自己言論:「我上得去講就代表我立場,我冇壓力、冇老細,我又唔使撈,香港需要我呢啲人,夠膽講真話。」被指曾破過兩次產?他說:「我從冇話過我叻,個叻字係TVB畀我,唔關我事。」而好友曾志偉昨日在活動上笑說:「我諗吓佢係咪飲醉酒,乜個節目錄影㗎咩?咁發覺唔對路剪得㗎嘛。」

相關新聞:【好文共賞】最有影響力的人

秋生:佢真係好鬼頂癮

《我》的嘉賓主持王迪詩昨在fb留言:「好多人問我訪問阿叻最難係乜?我答:忍笑。」想笑的還有黃秋生和何韻詩,秋生留言說:「阿叻哥俾人玩到謝咗,個國家唔係你嘅都講得出。哈哈哈!佢真係好鬼頂癮!」阿詩則說:「Freestyle龍門,唔止左右搬,直頭360度式自由上下前後滾動。識笑其實真係會笑到停唔到。」昨日網民亦洗版式狂插阿叻:「估唔到一個電視節目有如此大迴響,並暴露了某些人士的底牌,看清楚此人有多膚淺」、「陳百祥有幾叻?叻就唔使破兩次產啦!」等。
另外,阿叻於節目中又批評讀公開大學的學民思潮召集人黃之鋒「八間大學都考唔到,我點話你叻呀?」但對疑涉偽造學歷的蔡思貝卻好包容,他說:「世界乜都有,只要搵到錢嘅地方,就會有人諗計。」事後黃之鋒在fb反寸阿叻脫節,如今是講「幾多個5*」,又反問「陳百祥冇讀大學兼會考得13分,咪照樣做咗一線藝人」。王宗堯亦在fb留言:「感謝叻哥說出重點!就是因為我哋冇得選!」他昨再在電話補充:「每個年代都會有一啲時候令人民團結起嚟,民生唔好先反。」會否推舉阿叻做特首?宗堯笑說:「嘩,佢變成90後先啦!」
採訪:嵐山、盧妹

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載