› 選擇地區
三藩市
紐約
洛杉磯
其他美國地區
香港 台灣 北美
 
2015年12月27日

【動大事2015】
四哥齊昕兩巴掌 爭米戰邊個Win

喺2015年,娛樂圈發生咗好多事,總括嚟計就有幾件大事,而咁多件事分別有唔同嘅獎。

首先講兩巴「獎」:

第一巴「獎」係要頒畀四哥謝賢,當日佢哋拍攝無綫節目《四個小生去旅行》,之後喺8月出席記者會,四哥就打咗曾江一巴,仲誤傷埋胡楓,而剩低嘅一個小生Joe Junio,全程揸實支咪,就算佢冇大獎,都要頒個專業精神獎畀佢。

第二巴「獎」要頒畀特首之女梁齊昕,佢喺萬聖節當晚同朋友仔去中環夜浦,飲多兩杯就畀記者重重包圍,之後齊昕嘅朋友就打畀龍蝦媽,即係特首夫人梁唐青儀,點知龍蝦媽到場帶齊昕上的士嘅時候,就畀齊昕打咗一巴,呢一巴真係唔知震驚咗幾多萬,所以呢一巴「獎」好值得頒畀佢。

今年嘅至痛金獎,就要頒畀阿Sa(蔡卓妍)喇,因為喺9月佢同陳偉霆嘅戀情玩完,有傳就係陳偉霆搭上內地女星趙麗穎,不過阿Sa就堅稱冇第三者。

有人分手都有人有新戀情,新晉新人金獎就由Mandy Lieu奪得,佢撻著洗米華(周焯華),同洗米嫂隔空鬥法,兩個都同時懷有華種,仲要兩個都係女,其實都鬥到難分難解,但喺12月中,Mandy就高調回港,仲同洗米華高調一拖,令洗米嫂徹底死心,堅決搞離婚。

而新晉新人銀獎就由李澤楷奪得,佢今年8月被爆同新歡遊曼谷,仲同新歡喺街頭攬鍚。

今年仲有一個獎叫自稱人渣獎,咁就當然由自稱人渣嘅周永恆攞到啦,佢舊年被爆背住阿Yu(趙頌茹),撻著第三者Ruby(劉依靜),仲上埋阿Yu娘家搗亂,被控普通襲擊罪成,被判監兩個月,緩刑18個月,出到嚟嘅時候,周永恆成個人笑晒咁。

不過就有人笑唔出喇,就係成龍之子房祖名,舊年8月因為涉嫌容留他人吸毒被捕,最後獲「輕判」半年監禁,今年情人節前夕出獄,疑有特別特待遇,有四部公安車為佢開路,避開傳媒追訪,不過隔日就開記招道歉。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載