› 選擇地區
三藩市
紐約
洛杉磯
其他美國地區
香港 台灣 北美
 
2016年01月03日

封胸夜蒲老蘭
Jumbo孖斯文男猜枚隊酒

【中環】走性感路線嘅𡃁模曾淑雅(Jumbo),喺舊年8月俾本報影到佢同一個斯文男去咗蘭桂坊夜蒲,雖然Jumbo喺事後否認呢個男人係新歡,仲話只係工作上嘅朋友,之不過事隔幾個月,Jumbo又俾撞見同呢個斯文男夜蒲,睇嚟唔似係工作上嘅朋友咁簡單。
前晚喺蘭桂坊,Jumbo同呢個斯文男喺夜店飲嘢,今次Jumbo亦唔係一貫性感短裙嘅戰鬥格,竟然一身密實look兼冇乜化妝,佢哋兩個好似有講唔完嘅話題,大部份時間兩個人坐埋一齊,邊斟邊飲,成個世界好似得番佢哋兩個人咁。過咗一輪先有2、3個女友人走埋去一齊玩,不過斯文男依然係全程黐住Jumbo一齊坐,冇乜點理同枱啲女性朋友,搞到其中一個女友人唔理禁煙條例,好冇癮咁喺度點煙。
之後見到佢哋成班人喺度猜枚,玩玩吓仲見到Jumbo踎喺度揀酒,飲之前都會同斯文男研究吓,最後大家猜到興起,Jumbo仲負責斟酒。佢哋玩到凌晨兩點幾都未有見醉,繼續飲餐飽!

頭頭碰着黑

本來諗住打畀Jumbo恭喜佢拍拖,但係佢回應話:「我𠵱家仲係單身呀,我哋唔係拍拖,只不過係咁啱有朋友喺加拿大返咗嚟,咪約埋一齊出去玩吓。」
另外,Jumbo呢幾日都有自拍同update佢個Instagram,佢前日留言話:「2015過去啦,期待已久2016來了,上年真係好似頭頭碰着黑咁,所以最開心真係呢個犯太歲年終於快要過去,不過都仲要等埋個新年!!今年一樣簡單的希望!身體健健康康、工作順順利利,還有就是不再喝醉酒。」
採訪、攝影:楊浩賢、陳辰、羅德光

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載