› 選擇地區
三藩市
紐約
洛杉磯
其他美國地區
香港 台灣 北美
 
2016年01月11日

【馮仁昭四圍超】
三台百萬行 亞視新城落寞

無綫、亞視、新城三間傳媒噚日分別派代表參與喺政府大球場舉行嘅公益金百萬行起步禮,過往亞視有葉家寶帶隊,新城就有高層朱明銳,但𠵱家一個辭職一個被退休,亞視仲會喺4月1號釘牌,噚日分分鐘係亞視最後一次出席百萬行,而新城日前又裁咗30幾人,難怪兩個台噚日士氣低落。
新城噚日由副董事總經理宋文禧同馬健生率領薛家燕、林盛斌等50人進場,亞視就由營運總裁馬熙帶住袁潔儀、劉錫賢同張家瑩20幾人,聲勢跟無綫李寶安、黎耀祥、胡定欣等成百人相比失色,好在沿途都有市民同亞視打氣,算係有番小小安慰。

亞姐冇爛尾

講到噚日係亞視最後一年百萬行,劉錫賢話:「可能明年用第二個方式,唔好咁悲觀。」佢話馬熙向佢透露,短期內會約見藝員傾未來大計:「想令我哋有衝上去嘅心,因為𠵱家有落寞嘅感覺。」馬熙唔肯接受記者訪問,搵咗公關高層黃守東頂上,問家寶走咗之後亞視出糧法律責任邊個負責,黃守東唔肯多講;至於傳聞亞姐爛尾,黃守東就否認話:「總決賽好多贊助商同合作夥伴想同我哋合作,例如北京、深圳,講緊千萬計算,會盡快公佈落實日子,希望農曆新年前。」
至於新城傳聞因為娛樂節目冇錢賺而大裁員,高層馬健生就坦言:「錢真係賺得唔多嘅,不過娛樂都係生活一部份,所以仍然會有娛樂、音樂節目,只係少咗。」佢又否認會取消新城勁爆頒獎禮。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載