› 選擇地區
三藩市
紐約
洛杉磯
其他美國地區
香港 台灣 北美
 
2016年01月15日

馮仁昭四圍超:開騷再扮四大天王
思捷對吉位玩自嘲 - 馮仁昭

李思捷及單立文帶領Palwerful Band開騷,大玩諧音粗口。

榮獲十大討厭藝人選舉第四名嘅李思捷前晚同老友單立文(豹哥)喺伊館開騷,雖然之前佢哋話賣票成績滿意,但係現場所見,入座率只係得七成。唔怪得豹哥喺現場都自嘲兼揶揄李思捷話:「通常我係紅館開,𠵱家喺伊館,我覺得好屈質。我都要恭喜思捷攞咗十大討厭藝人第四位,認受性仲高過特首,因為開呢個騷俾人話係小鮮肉,李思捷就係俾人『小』完先再侮辱。」

豹哥講家駒喊晒

前晚「今晚豹制李」個騷,重點都係大玩諧音粗口同埋四大天王之一嘅郭富城,李思捷扮劉德華唱《愛不完》、學友唱《屈到病》、黎明唱《一百樣可能》,最後扮郭富城出來嘅時候,豹哥指住李思捷個口話:「你個口有條毛,哦!原來係𡃁模,點解你有條毛喺身邊㗎?你又食𡃁,又食風扇,又食咩黛琳,你雜食都有好處,又食風,又食毛,身體好,跳到咁都唔腳軟,我就唔得喇!」最後佢就唱《失憶諒解備忘錄》。
趣劇有王敏德、江美儀同喬寶寶幫手,王敏德被安排用半鹹半淡廣東話講諧音粗口,好似「delay no more」、「look out」等,仲有「原始人條脷有毛、現代人條脷冇毛」,事後豹哥被問到現場有小朋友,但係個騷仍講粗口,佢話:「我都冇講啲乜嘢呀!」另外,有一個環節係俾豹哥懷緬已故歌手香港女兒梅艷芳、香港變色龍羅文,張國榮、黃家駒和陳百強,豹哥講到好友家駒更邊講邊喊,十分感動。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載