› 選擇地區
三藩市
紐約
洛杉磯
其他美國地區
香港 台灣 北美
 
2016年01月24日

千嬅嘆茶揀袋
Torres打機解悶

【中環】潮媽楊千嬅帶囝囝出動,多數喜歡孭背囊,貪佢夠大乜都放晒入去,又可以騰出雙手自由活動。千嬅前日又帶住約3歲囝囝丁進諾(Torres)去中環置地行街,同行仲有外傭同助手,一行四人入咗Alexander McQueen度血拼,素顏嘅千嬅主攻新款背囊,店員識做奉上熱飲,咁千嬅就慢慢嘆茶同揀袋,河童頭嘅Torres就由外傭陪住坐沙發打機,母子各有各忙。
千嬅快靚正揀啱心頭好,立即叫店員埋單,其間佢獲悉有記者拍攝,千嬅馬上將當頭箍嘅太陽鏡戴番,跟住就由助手代攞戰利品離開。千嬅一馬當先開路,外傭就抱住Torres,精靈嘅Torres就手指指記者,認真又老積咁話:「唔好影相。」好鬼醒目。

遇趙太吹水

千嬅一行人跟住向雪廠街方向行去,由於外面正落雨,助手為外傭同Torres擔遮,Torres就一直望實記者鏡頭,佢再次指住叫唔好影相。其後佢哋喺街上又撞到着住皮草嘅名媛趙曾學韞,趙太同千嬅企埋一邊吹咗一陣水,千嬅同佢握一握手先離開,跟住佢哋急步行咗去上保母車走人。
採訪、攝影:羅德光

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載