› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

【add】紅人主場:
黃耀明 香港團結吧!

一向敢言的歌手黃耀明,由同志平權到爭取普選而走上街頭,2014年因參與一場「雨傘運動」,觸及敏感政治話題,被內地封殺之餘更不獲寰亞續約,被停工,讓他走得更前,更意識到當下香港的社會再撕裂下去,就好快會玩完,被揀中活在這個時空,實在很難獨善其身,明哥憑着這份勇氣,籲港人要團結起來,不退縮,繼續站出來發聲。

撰文、造型:顏英儀
攝影:周樂恒
化妝:Ivan Lee of Headquaters
髮型:Hubei Har

敢言的明哥黃耀明,年前大膽出櫃,承認自己是同性戀者,也是圈中少數站在最前線活躍社會運動的歌手,因「雨傘運動」而被內地封殺之餘,前年不獲寰亞續約,工作量大減,但曝光率卻有增無減,明哥積極參與前線社會運動,關於他的新聞由娛樂版轉到港聞版,然而圈中願意企出來的人少之又少,「識我嘅人都知我一向關心時事,可能以前冇走得咁前,因為舊時社會冇咁政治化,以前大家認為藝人同政治係分開,但其實如果你唔理政治,政治會找上門,世界太平盛世就冇事,𠵱家個社會好亂,好難獨善其身,其他人有自己嘅想法,我覺得呢個係我嘅選擇。」

害怕但不畏懼

站在前線,又被內地封殺,有想過人身安全?「喺一個文明嘅世界,冇人要為自己講過嘅說話或者政治立場而害怕,可惜𠵱家係一個越來越唔文明、唔理想嘅社會,我有時都會驚㗎,但你有需要做正確嘅事,冇得驚,我唔會因為怕危險而㩒住自己講正確嘅嘢!早前我喺Ig有個post,突然間有萬五個留言,有好多都係鬧你,呢啲係網上無形暴力,人多勢眾想滅你聲,𠵱家已經進入一個壓制言論自由嘅時代。」

香港人要覺醒

明哥入行30年,不時將社會議題放入歌中,「有時我會覺得太多message,可能大家會驚咗,有時我想表達我想講嘅事,唔一定要係音樂,可以透過參與社會運動或者社交平台表達,我唔想將音樂負苛太重。」當下明哥最希望香港人可以團結一致,一起抵抗惡勢力,「香港人千祈唔好內訌,大家有不同意見,要搵出方法磨平不同意見,一齊團結,抵擋惡勢力,如果唔團結,香港就玩完!𠵱家已經夠晒撕裂,大家係時候覺醒。」

自資搞演唱會

身為香港七百萬之一分子,活在今天的香港開心嗎?「我諗大家都想太平盛世社會和諧,我哋被揀中活喺呢個時空,大家要好好面對,要活得有意義,呢一刻《太平山下》呢首歌最可以表達我嘅心情,首歌喺三年前寫,關於香港處於極其混亂嘅狀況,到𠵱家都可以描繪到同樣嘅畫面。但若非遇上呢個時候,你可能會諗唔到創意嘅點子,呢個時代令你皺眉頭,就不如做多啲創作,轉化成開心嘅事。」
他續說:「所以決定4月1同2號喺旺角麥花臣球場開騷,因為亞洲電視會喺4月1日結束免費電視牌照,覺得可能係一個最好時候,將香港嘅一個時代去紀錄,所以決定做一個演出,叫做『美麗的呼聲·一場事先張揚的命案』,作為文化工作者、音樂人,我覺得有責任去記錄關於香港人嘅歷史。」

受大衞寶兒影響

有樂壇變色龍之稱的英倫搖滾歌手大衞寶兒(David Bowie),在本月10日因癌病去世,結束69年傳奇故事,自小受英倫音樂影響的明哥,自言十分欣賞這位前衞先驅,「大衞寶兒對我嘅影響不單喺音樂上,佢嘅哲學,對視覺美學追求,到台風同表演都畀到我好多靈感,造型百變,永遠畀人意想不到嘅驚喜,更加刺激大家嘅想像,係一個真正全面嘅藝術家,有空前絕後嘅影響力。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載