› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

馮仁昭四圍超:
阿B冼國林進軍娛樂台 志偉唱反調 - 馮仁昭

鍾鎮濤做總監、冼國林投資15億人民幣喺廣東開嘅「好娛樂頻道」,噚日喺紅磡海逸君綽酒店搞記招,有唔少圈中友好撐場,冼國林新愛將周嘉莉就「露底」贈興,而有傳掛住拍拖被雪藏嘅陳嘉桓就露背上陣。台上嘉賓都係講恭喜說話,惟獨曾志偉唱反調,好抵死咁話:「一睇就知呢個電視台係黑暗喇!不過我都考慮出吓唱片先,譚詠麟唔係話唔攞獎咩?健仔個獎keep好啲,梅艷芳啲獎拍賣百幾萬㗎!」
呢個頻道有乜嘢特色?總監阿B話:「市場好大,內地點擊率有十億以上,我哋嘅優勢係有廣東話製作,推動電影歌曲同藝人,係一個好好平台,一個廣東省就有過億人口。」

3月有節目睇

至於睇呢個頻道使唔使錢呢?投資者冼國林話:「頻道已經運作緊,大家可以喺手機、電腦、平板電腦睇,3月份就有節目播喇。收費有唔同方法,網劇頭十集唔使畀,之後要畀,市場有我哋都會做,同埋有優惠價。」
同場嘅過氣情侶朱慧敏同彭懷安(Eddie),𠵱家佢哋只限於生意上嘅拍檔,訪問都係各自各講工作,講到翻撻嘅可能性?Eddie話:「一切隨緣喇!」而憑良心講真話,得罪新老闆司榮彬慘遭雪藏嘅蔡國威話:「自己噚日先落機,唔知亞視發生乜嘢事,有同事話未收到12月份薪金,情況都令人擔心,管理層要解決事件,如果入咗數,藝員科會講聲,但我就未收到通知囉。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載