› 選擇地區
三藩市
紐約
洛杉磯
其他美國地區
香港 台灣 北美
 
2016年02月04日

【add】紅人主場:一年 蘇麗珊

《十年》的明日想像,可能是最壞的時代。但同一時間,23歲的蘇麗珊卻正創造她最好的時代,因為《哪一天我們會飛》上映而由無名小女生躍升成為影壇新星,一年內,極速的成名歷程對她來說,卻仍然像一場超現實的夢。

統籌:林妙萍
造型及撰文:趙潔恆
攝影:郭賢興
化妝:Jan Chan of Annie G. Chan
髮型:Nat Chan

蘇麗珊一片成名,在電影《哪一天我們會飛》中演年輕版楊千嬅,演清純學生妹自然討好,繼早前獲台灣金馬獎提名後,也剛獲提名香港電影金像獎最佳新演員,「之前去金馬獎都過咗幾個月,都仲覺得好似唔係真嘅一樣。」出戰金像獎,她不好意思地笑着說:「我覺得(得獎)機會真係唔大,因為今年實在有好多實力更好嘅演員呀!」即使沒有獎座加持,蘇麗珊卻賺了不少工作機會,更被封為新一代宅男女神,「的確好感恩,身邊有好多人幫我,不過我又唔覺得知名度高咗而令生活有大轉變,我出街又唔會特登化靚啲妝,着靚啲衫。如果喺街度有人望住我,可能係因為我着得好醜樣,哈哈!」

Po文要小心

蘇麗珊不怕開始被大眾認得而沒有私隱,但發覺在網上世界,自己原來post甚麼都有可能成為新聞,「試過有媒體會拎我喺facebook寫嘅嘢做報道,好似有次係一張無聊嘅自拍,話我心情唔受影響之類,我發現原來咁樣都會引起興趣喎。都覺得喺網上要慎言,因為媒體係水能載舟亦能覆舟,可能會將我句說話解讀成唔同意思,都要小心。不過我又好少發表啲好激烈言論嘅,都冇呢方面嘅顧慮。」

男神要靚仔

因為《哪》片,蘇麗珊還得到了愛情,跟戲中拍檔游學修戲假情真,講到當初公開戀情又笑笑口:「我諗係唔識死啩,其實又唔係主動公開,係黃修平導演喺訪問中唔覺意講咗出嚟,咁我哋抱住唔想講大話嘅心態。」早前男友在港台節目《我係乜乜乜》中競選男神,在她心目中的男神卻不是游學修,「我又唔好男神呢一味,不過真係要我揀一個,咁我揀彭于晏啦,因為佢好靚仔,男神係觀賞嘅,唔可以親近。揀男朋友就係另一回事啦,要睇性格啦、價值觀啦。」那麼男友游學修為甚麼會得到女神芳心呢?「佢好好笑囉!我好鍾意做無聊嘢,佢又會同番我講白癡嘢,啱channel呀!」

唔同港女爭

有些人選男友要看package,蘇麗珊都對這樣的用字反感,「的確係要睇好多方面,但又唔可以用package呢個字,好似唔係好尊重,好似貨品咁sell。我又唔會有張checklist,有家底嘅剔,有樣剔,我唔覺得要係咁。」對於有些港女被看成好現實,她也有自己的見解,「其實冇問題㗎,每個人都有自己想要嘅嘢,可能佢哋成長嘅時候被灌輸一啲想法,佢哋冇錯,係價值觀唔同,仲好啦,大家唔使爭。」

理想情人節

情人節就到,女士們都愛收花,但蘇麗珊卻耍手擰頭:「我唔鍾意收花呀,因為送花唔環保。如果種嘅花都得,不過要易種嘅,因為我試過連仙人掌都種死。」至於要怎樣過情人節,「一諗起浪漫嘅地方就會聯想起沙灘,兩個人行沙灘係好浪漫,不過唔知咁嘅天氣行沙灘會唔會凍死?」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載