› 選擇地區
三藩市
紐約
洛杉磯
其他美國地區
香港 台灣 北美
 
2016年02月05日

廿四孝老竇做司機
學友哼住歌 接細女放學

【中環】
今年張學友同羅美薇踏入結婚20周年,二人先後育有15歲大女張瑤華同10歲細女張瑤萱。向來好注重家庭同私隱嘅學友夫婦,多年嚟為咗保護愛女,甚少一家四口高調出巡,以至兩女極少曝光,細女樣貌更係從未俾傳媒影過。
近排學友除咗忙宣傳新戲,原來佢亦趁空檔,每日做柴可夫接女兒返學同放學。前日下晝5點,記者發現駕駛着黑色Range Rover嘅學友,頭戴cap帽面戴口罩,包到冚喺中環擺花街現身。而一直坐喺車廂入面聽着headphone嘅學友,嘴郁郁似哼住歌。其間曾經有途人向學友座駕行注目禮,但坐喺車入面嘅學友依然氣定神閒耐心等候。

五官標致似媽咪

學友足足等咗25分鐘,着上學校運動服嘅細女張瑤萱,就由一個中年女人帶住步行上車。現場所見,呢位從未曝過光嘅張家二小姐,雖然今年只得10歲,但已長得亭亭玉立,眼大鼻高,標致五官仲有幾分似媽咪羅美薇。佢臨上車前,好眼利咁望到記者影相,於是即刻快速縮入車廂。
學友曾講過因為自己太錫囡囡,搞到屋企多咗兩個公主:「佢哋連洗衣機都唔識開,將啲衫拋到周地都係,我仲要幫佢執,真係自作自受,我都有份寵佢哋,我教女好渣!」其實兩個女兒有廿四孝爸爸照顧周到,就算做公主又何妨?
採訪、攝影:梁繼光、黃曉程

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載