蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年02月07日
馬上成為壹會員

林作麥明詩甜遊嘉年華
陳瀅高8度冧猷亨:好犀利

年廿八,大媽鍾意洗邋遢,咁未結婚嘅熱戀男女究竟去邊好?當然要去玩新奇刺激好玩嘅嘢啦!昨日黃昏6點幾,《蘋果》記者發現陳瀅同何猷亨、麥明詩同林作兩pair情侶結伴去咗中環AIA嘉年華。

最初兩pair人兵分兩路玩攤位遊戲,陳瀅同猷亨去玩掟波波,眼界奇準嘅猷亨,竟然掟咗幾吓就贏咗個大獎,搞到女友心花怒放,即時用bling bling眼神加高8度讚嘆嘅語氣話:「嘩!你好犀利呀!」o氹到猷亨好冧。到揀公仔嗰陣,小情侶就乘機打情罵俏,一個要紅色、一個個就話要白色,咁最後就梗係猷亨就晒女友啦!
之後陳瀅同猷亨會合番林作同麥明詩,四個心就揀咗「Star Flyer」機動遊戲玩盪鞦韆,其間戴住白色cap帽嘅陳瀅畀個鞦韆fing得兩fing,連頂帽都fing埋落地,陰功豬豬,好彩猷亨玩完遊戲第一時間幫女友執番頂帽,咁gentleman,抵女友錫錫啦!

至於全程拎住杯啤酒邊行邊飲嘅林作,見女友話要去廁所,就做跟得男友企喺廁所門口等,仲幫女友拎手袋。麥明詩出嚟嗰陣,林作仲好鬼馬拎起手機同女友selfie。
其實沿途有唔少人認得陳瀅同麥明詩,想同佢哋合照,而兩位男士亦好有耐心咁等候女友影相。Fans影完相,猷亨反過嚟要求fans幫佢哋影張大合照。兩pair人玩咗接近兩粒鐘,拎住滿手戰利品嘅佢哋,到7:45pm先閃人,滿載而歸!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載