› 選擇地區
三藩市
紐約
洛杉磯
其他美國地區
香港 台灣 北美
 
2016年02月09日

馮仁昭四圍超:
星級利是B拜年搶萌 - 馮仁昭

踏入猴年,好多藝人立即透過網上給粉絲送祝福,尤其已婚有子女嘅星爸媽,當然悉心為佢哋嘅星BB扮靚賀年。錢嘉樂同湯盈盈噚日凌晨搶閘放閃,同大女錢凱晴(Alyssa)及五個月大嘅錢凱琪(Kassidy)着到紅噹噹影賀年相。而同樣咁有外父相、生咗三個女嘅林盛斌(Bob)都係着紅色,驟眼望去真係似五個利是封,仲唔係五福臨門。

諸葛囝囝幫手拎

吳鎮宇亦好有心思,喺facebook貼咗張囝囝Feynman疑似孫悟空合成相,Feynman頭上有金剛箍,鎮宇唔知係咪想做唐僧收伏囝囝。人妻諸葛紫岐喺年廿九晚已經準備好做「狂派」,喺微博晒咗目測至少有500封利是相,噚日囝囝韜韜着住傳統賀年衫配螢光綠太陽眼鏡,醒神又有型,佢幫媽媽拎住個擺滿利是嘅背囊,但似乎重到拎唔起!
陳小春同應采兒噚日大清早就帶埋囝囝同大家拜年,而關伊彤同余曉彤(Hidy)外出拜年時都幫自已個囡囡打扮得靚靚,關伊彤兩個女換上旗袍新裝去黃大仙上香;Hidy就幫剛滿3個月大嘅囡囡劉頴依(Willa)着上粉紅色棉襖配白色冷帽,對住鏡頭瞇瞇笑賣萌樣。另外台灣藝人黑人陳建州一家四口,及家有「好」字嘅譚耀文都連同一對子女向大家拜年,佢話:「猴年願望好簡單、好快樂。我祝大家今年萬事如意、身體健康。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載