› 選擇地區
三藩市
紐約
洛杉磯
其他美國地區
香港 台灣 北美
 
2016年02月14日

老婆大病重生首個情人節
艾威融化威嫂 盼下世再遇

情人節,不止是熱戀中的情侶要慶祝,甜蜜的準新人,共度七年之癢的合拍夫妻,甚至是患病見真情的囉唆夫婦,都有他們值得紀念的愛情故事。熱戀期的張致恒和莊端兒、準新娘白雲、結婚7年的名模Jocelyn和Anthony,還有去年穿梭生與死的艾威和太太威嫂,適逢情人節兼人日齊齊向枕邊人傳情達意,結婚14年的艾威說:「要好好珍惜呢一世。」威嫂亦開腔向艾威真情告白說:「希望下一世可以再重遇你!」
撰文:楊潔雯

相關新聞:Jocelyn打老公 解七年之癢

艾威太太Lisa(威嫂)去年子宮發現巨瘤,一度被指有「餡」。威嫂割瘤後數月,肝、腎出現積水和氣泡,結果她在一年間先後3次出入手術室,由脹爆身形再突然暴瘦;為幫太太醫病,艾威花掉近百萬儲蓄,幾乎一鋪清袋。為了大病痊癒的威嫂,艾威日前親自下廚炮製有益健康的晚餐,慶祝擊退病魔後重生的首個情人節,精神奕奕的威嫂首次開腔,與艾威細訴過去一年患難見真情的經歷。
威嫂大病之時,艾威的事業又停滯不前,面對重重困難,問如何自處?艾威說:「我冇喊喎!我啲眼淚係要收錢,嗰段時間唔敢嗌交,最大導火線都係佢唔肯去開刀。」如今威嫂病癒,艾威說話仍然毫不留情:「太太其實唔合格,好多問題,不過既然佢咁鍾意我就算,佢都係差唔多死先話我靚仔。」

願意捐肝

威嫂任職管理階層,性格堅毅不屈,不喜歡哭哭啼啼,從不在人前喊的她說:「見到佢(艾威)好擔心、好辛苦,又唔想加重佢負擔,佢出咗去開工,淨番我一個人喺屋企,咁我會(喊)囉!我喊完就唔記得,佢返嚟見到我就冇事,我當時一日睇5個醫生,4個西醫一個中醫。其實我做完3次手術,食西藥令到個人都好辛苦,食唔到又瞓唔到,但𠵱家我淨係睇中醫調理。」
在最差的時候,威嫂腎和肝功能急降,肝功能只剩下20%,當時情況若變壞,便要換肝和腎,威嫂說:「老公第一件事話畀個肝我,我哥哥都話可以捐少少畀我,但係老公話佢得,佢話有乜嘢需要會幫我解決幫我頂,所有嘢交畀佢做得喇!」

相關新聞:張致恒兩年後娶莊端兒

自拍告白

在雨過天晴後的首個情人節,威嫂嚐了老公的愛心晚餐,她又送上自拍真情告白致謝,威嫂說:「老公係啲囉囉唆唆嘅人,不過佢都係珍惜我,我應該講多謝,雖然好老套,但多謝係唔夠,應該係講感激。經歷咗咁多嘢,都係咁囉唆,又冇任何埋怨,盡力咁照顧我,好多謝你對我嘅包容,對我做嘅心意,我諗好難下一世再搵個好似你咁嘅老公,希望下一世可以再重遇你!」
對老婆的剖白,艾威竟然「冷」回應:「都係勸佢咋,唔係話第二世搵番佢,冇第二世,所以要好好珍惜呢一世。如果你真係愛我嘅話,你好好控制自己嘅起居飲食,到𠵱家都未肯早睡早起,又未戒凍飲,仲想食完晚飯繼續打麻雀,如果真係有心多謝我,做好呢幾樣嘢先同我講幾咁鍾意我。」艾威語重,卻心長,愛就是這麼簡單!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載