› 選擇地區
三藩市
紐約
洛杉磯
其他美國地區
香港 台灣 北美
 
2016年03月01日

景峰拖𡃁版栢芝
開餐睇樓盤

【天后】現年25歲嘅龐景峰(Andrew),不時傳出夜蒲兼緋聞,但自從舊年簽咗畀韓國公司正式出道後,就經常陪媽咪郭秀雲出席活動,母慈子孝建立乖乖仔形象。
不過早排自稱單身嘅佢,前晚約10點就俾本報記者影到同一個妙齡少女,喺大坑浣紗街一間食日式串燒嘅食店撐枱腳。記者事後發現嗰位少女原來係兩年前曾退選港姐、舊年轉戰國際小姐、芳齡22歲兼有「𡃁版栢芝」之稱嘅楊埕(Sabrina)。小情侶一路食一路傾,到11點半都未捨得走,連食店打烊、班員工換晒衫企喺門口等佢哋都唔知。最後Andrew埋單走人,同女友十指緊扣咁喺附近拍拖散步。仲行到出馬路中間。

送女友坐巴士

佢哋散步期間,途經一間地產舖見到樓盤廣告,Andrew同女友對住櫥窗指手劃腳,記者聽到佢同女友講解話:「呢個單位咪喺呢度囉!」隨即指一指附近一棟大廈,似有意入市或租樓盤。雖然啱啱食完串燒,但Andrew可能未夠飽,佢之後帶咗女友去天后食甜品,食完就陪女友到巴士站等車,等女友上車後,Andrew就截的士返屋企。
記者見Sabrina落車返大圍寓所時,路經一條黑麻麻天橋都要兩頭擰急急腳行。話晒夜深人靜,加上最近有當街斬人事件,下次Andrew最好畀番啲gentleman風度出嚟,送到女友返屋企門口,咁先萬無一失嘛!
採訪、攝影:畢紹基、朱志聰

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載