蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月04日

大台又抄橋?
《潮流教主》勁似日劇《First Class》

喺大台孭得飛嘅花旦走一個、走下又一個,如果你屋企嘅公仔箱,因為家人而慣性常開,就會發覺啲女一角色,睇嚟睇去都係啲新晉力谷小花陳凱琳、蔡思貝等,即係連演技都唔可以叫好嗰啲,大台力谷仲有李佳芯同陳瀅,好似大台近日播《潮流教主》,講陳豪做時尚雜誌總編輯,帶領旗下一班女職員搞fashion,似就似係玩新嘢!

不過啲劇情又係抄日劇《First Class》,當中被網民封為「世紀煩音達」嘅蔡思貝,亦繼續做一啲熱血努力角色,唔少網民都覺得佢慘被大台「定型」,就好似幾個女演員演開被強姦嘅角色,就長期喺劇中被姦,認真夠晒悽涼,認為蔡思貝可以演啲cool嘅角色。

昨日有周刊稱大台劇《潮》係抄兩年前嘅日劇《First Class》,呢套日劇第二輯上年更喺J2台播過,蔡思貝演嘅「張逸寧」仲同《First Class》女主角「吉成千奈美」澤尻英龍華好似,又係講一個打扮好娘嘅女仔入行,喺最top嘅潮流雜誌社,點被公司啲人恰,個人點上進,角色同劇情都大致相同,報道更指,有一集更加離譜,連劇情都一樣,講有個model甩底,要臨時搵人頂上做model,蔡思貝著嘅背心裙,仲要同《First Class》嘅吉成千奈美差唔多款

拍攝當中亦加咗好多內心劇嘅位,不過唔係用眼神去交代,而係用內心對白去演,呢個都係日劇最常用嘅手法,大台o依家先抄嚟當新嘢遲唔遲啲,另外,陳豪喺劇中成日叫啲下屬去天台,《First Class》亦有唔少重要場景喺天台拍攝噃!

角色當然唔止抄一個喇,楊秀惠演嘅富二代角色都有「藍本」就係喺《First Class》由菜菜緒演嘅「千金高層」,又係女主角吉成千奈美嘅死敵,咁啱楊秀惠喺劇中又係蔡思貝嘅死敵,就係撞都冇咁橋!

不過,成套劇最多人彈嘅係陳豪演戲,造型明扮時裝界名人「老佛爺」Karl Lagerfeld,咁陳豪本身夠高,絕對係model底子,但唔係「教主」feel,有網民覺得個角色如果由黃子華去演一定更好。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載