蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月05日

盧大偉笑匠殞落
遺孀:傳承歡樂精神

「歡樂今宵,再會!各位觀眾,晚安!」昔日唱過無數次《晚安歌》的爛gag鼻祖盧大偉(盧David),終於要跟大家道別。去年飽受癌魔折磨的他,昨早因癌病逝,享年71歲。與盧David相伴逾15載的盧太Quiency,昨懷着傷痛謂不捨丈夫離去,但坦言:「我再咁樣沉落去唔係我老公想見到嘅事。」並承諾會繼續經營丈夫生前創辦的教室,將正能量和歡樂傳揚開去。

相關新聞:鵬哥懷念頑皮老拍檔

不懂廣東話的「香港人」,不會體會盧大偉爛gag趣味。70年代開始在《歡樂今宵》搞爛gag帶給觀眾歡樂的盧David,去年2月因患癌致體重急跌,近日傳出病情反覆,要入院接受治療。一直堅強與病魔搏鬥的他,前晚病情急轉直下,情況危殆,醫護人員要為他注射嗎啡針止痛,並一度傳出彌留消息,不少好友紛紛趕到醫院探望,直至昨晨6時,盧David血壓急跌,最終不敵病魔折磨與世長辭,享年71歲。
盧大偉與太太Quiency結婚逾15載,盧太一直貼身照顧丈夫,昨日她與好友丁羽、無綫前高層何麗全、ViuTV高層金廣誠及姨甥Jeff等親友,陪伴在側送盧David最後一程。昨早約10時,戴上口罩的盧太在眾親友陪同下在醫院會見傳媒,她懷着傷痛說:「David今朝早上6點49分返咗天家,其實佢自己一直都有盼望,冇放棄過,直至噚日傍晚有少少變化。」問是否打嗎啡針止痛?盧太說:「噚晚有打好微量,我一直有陪住佢,係有啲攰,有痰嗰種辛苦,希望大家focus喺David喺香港畀咗好多正面同歡樂大家,乜嘢病就唔回應,總之唔係傳聞中嘅腸癌。」

在不同的空間合作

盧太表示丈夫生前創辦的教室,她決心繼續經營,並希望發揚丈夫積極正面精神,她說:「期望香港可以和諧同開心,身邊人開心,佢有個教室會繼續做將呢個精神發揚出去。一直係我陪佢一齊搞,自然都係我繼續營運。」
為照顧丈夫,盧太坦言自己瘦了20、30磅,又多次強調不捨丈夫離開:「我夠膽講我係好唔捨得David,David都好唔捨得我。但係我哋只係喺唔同嘅空間做唔同嘅嘢,我要更投人去做一啲David喜歡做嘅嘢。David有個同學會,3月13號有個關懷社區嘅行動,如果大家支持社會正能量可以嚟參加。我再咁樣沉落去,唔係我老公想見到嘅事,我都要同自己講,要分工合作。佢就上咗天家嘆世界,我就喺地下執行佢要做嘅嘢。」有關出殯事宜,盧太稍後會與盧David有好友及演藝人協會商議。

相關新聞:無限歡樂:盧David的十件逸事

「佢天生係一個藝人」

之後盧太偕親友到柴灣酒樓午膳,問心情是否平復?她苦笑說:「如果我話畀你聽我呢一刻係完全平復嘅,即係我唔愛呢個男人。」問盧David可有遺言﹖盧太說:「我哋一路有溝通,唔係last minute先問,我哋咁多年婚姻,相處都知道有乜係想我做。佢天生係一個藝人,入到片場就好似蝴蝶飛舞嘅心情,佢呢幾年生命入面最重要係學生同埋教室,最緊要將正面同和諧嘅心宣揚開去。」
問盧David移民外國的胞兄蕭亮會否返港送別時,盧太表示未知。說罷盧太在另一姪兒陪同下到杏花邨海旁公園坐下休息,說希望散步唞氣,她在海旁沉思了近一小時離開,並主動向傳媒解釋說:「頭先嗰度係我同David成日去嘅地方。」盡現思念丈夫之情,之後盧太折返醫院為亡夫辦手續後離開。
採訪:盧妹
攝影:陳慧安、畢紹基、潘冠恩

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載