› 選擇地區
三藩市
紐約
洛杉磯
其他美國地區
香港 台灣 北美
 
2016年03月17日

爆出小三 老婆夜審要跪玻璃
盛品儒背妻媾女認錯

現年39歲的亞視前高層盛品儒花弗有前科,新婚未夠兩年,前日又爆出有小三Tasha,女方不甘遭冷落,爆料指曾為盛品儒「落仔」,她自稱手頭有醫生紙和超聲波證明,昨以短訊攻勢逼盛品儒夫婦見面兼對話。盛品儒再度偷食闖禍,馬上淆底向太太蔡一鳳認錯,前晚經老婆夜審後,盛品儒昨自爆徹夜跪玻璃求原諒,承諾會生性。

相關新聞:多次斷正:鍾情亞姐

亞視前高層盛品儒前年跟銳思集團主席蔡一鳳拍拖時,男方曾被爆街頭啜爆C奶𡃁模郭奕芯(Ashina),蔡一鳳一度嬲爆險釀分手,盛品儒同年即用一紙婚書成功箍煲,去年底補擺婚宴。但前日又傳出盛品儒再出軌,有人在香港討論區開帖,呻遭人搞大肚要落仔。
前日有網友在討論區申訴遇上名人感情騙子,並揞名爆:「成年啦,佢每次都係叫我等佢……佢𠵱家創緊業好忙,佢叫我等佢返嚟……其實6月嗰陣時我有咗,我冇話畀佢知,因為我知道佢一定會驚……」前晚有讀者爆料指事件涉及盛品儒,昨日繼續有讀者起小三底,有指她叫Tasha,她不時在fb貼出腿張開大跳鋼管舞相,甚至貼展示胸前事業線的誘人照片。

蔡一鳳:喺結婚前識

記者前晚短訊盛品儒求證令小三「落仔」傳聞,他回覆:「又俾人黑?當然否認,沒有此事,我沒有。」蔡一鳳向老公審問後,前晚在電話中回應:「James(盛品儒)解釋同個女仔喺結婚前識,記得舊年2月,有晚半夜老公收到個女仔短訊,我當時都查問咗,仲要老公快啲同人講清楚,唔好畀人幻想同希望。James同時承認幾個月前,我出咗trip,佢背住我同個女仔出去飲嘢,我就話佢結婚前點玩都得,但結婚之後就要對家庭負責任,佢都話知錯,堅決否認同女仔有親密關係。」兩公婆之間突然彈出小三Tasha,蔡一鳳仍有EQ㩒住怒火,前晚還孖咇到銅鑼灣時代廣場睇戲,離開時更十指緊扣,蔡一鳳等𨋢時又讓盛品儒錫面,還做柴可夫載老公返歸

相關新聞:網聊出事:陳柏霖戀情曝光

「出去飲過幾次嘢」

記者昨日再致電盛品儒,他解釋搭上小三Tasha經過:「我結婚前同佢透過fb網聊識嘅,老婆成日出差,陪唔到我,有時又嗌交,我咪識女仔激佢,我哋出去飲過幾次嘢,佢成日想見我,我話下次先,我承認係拖住對方,我處理得唔好,我都要同佢講『對唔住』。」盛品儒強調沒跟Tasha發生親密關係,也沒影過情慾相,對於有人在網上大爆落仔,問他會否考慮法律追究?他竟大方說:「我諗唔好搞大件事,我都有錯,我話斬纜又冇同佢講清楚,呢次講清楚,嚴正啲。」盛品儒認死狗求老婆原諒:「我跪咗成晚玻璃,膝頭都損晒。」更不忘擦老婆鞋:「我好對唔住我老婆,我娶到呢個老婆三生有幸。」蔡一鳳經過一晚冷靜已原諒老公,盛品儒明日會去泰國公幹,他臨時決定帶老婆同行,以旅行補鑊,昨晚他又黐實蔡一鳳去澳門出席活動。
記者昨致電Tasha求證,她的手機轉駁到留言信箱。但Tasha昨午不斷傳短訊給盛品儒求見面兼力斥他不是,即使盛品儒斬釘截鐵絕交,但Tasha仍咬着不放:「你會搞大你朋友的肚嗎?醫生紙、超聲波照,我還留住……我知道你很憎我,但我仍然鍾意你,如果不是你,我不會下掉(墮胎),你必須為自己做的事負責。」盛品儒狠心不覆,她便在蔡一鳳fb留言,欲相約正印講數。
採訪、攝影:陳杰、梁繼光、朱志聰

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載