› 選擇地區
三藩市
紐約
洛杉磯
其他美國地區
香港 台灣 北美
 
2016年03月18日

有話兒:寶珠阿嗲牡丹亭相會爆壓力

寶珠(左)與阿嗲老友鬼鬼,齊齊踏台板演出任白戲寶《牡丹亭驚夢》無難度。攝影:陳志嵐

粵劇名伶陳寶珠與梅雪詩(阿嗲)在兩年前因為任劍輝百歲冥壽與逝世25周年,在師父白雪仙的統領下,合體演出《再世紅梅記》,最近寶珠姐與阿嗲再度合體,演出任白名劇《牡丹亭驚夢》,雖然主辦單位已經兩度加場,在票房方面早已沒有壓力,大家反而孭上一身飛債,不過這對相識超過半世紀的好拍檔,不約而同表示仍然背負一身壓力。
撰文:何慧斯

舞台上的才子佳人陳寶珠與梅雪詩今次合演《牡丹亭驚夢》,寶珠姐說:「我本身未做過呢個劇目,今次係第一次,對我嚟講會係一個新嘗試,好彩我哋上次合作過一次,本身已經有默契,有咗呢個默契,對大家嘅了解多咗,感覺好似親密好多,雖然呢個劇目好輕鬆,角色好得意,儍儍戇戇,但係私底下唔易做,演出唔可以過火,但係又唔可以唔到位,真係要恰到好處,呢個係最難嘅地方,你知任姐做得係好恰到好處。」不過阿嗲對拍檔兼好友當然讚不絕口,她笑說:「我哋不嬲都咁親密,佢喺台上好風流倜儻,好書生。」

相關新聞:支持國粹繼續傳承

仙姐監場

向來都對自己有極高要求的寶珠姐和阿嗲,每次演出的準備工夫當然做到足,從圍讀、綵排以致調理身體,兩人都一絲不苟,務求以最佳狀態站在台上,不過兩人異口同聲地表示,仍然背負一身壓力,寶珠姐說:「壓力來自多方面,可能經過上一次嘅戲,自然會要求比上次更加好,希望更加努力演出,我要求都係高,唔好話得到大家嘅認同,但求希望大家睇完之後,都不枉真係買飛入場,我仲有好多講唔出嘅壓力,呢啲人哋係唔會知,只係自己心裏知道同感受到,,最擔心係交唔準俾師父,因為仙姐都會叫我哋讀熟劇本,跟住上去排畀佢睇,呢個壓力真係好大,雖然我由出道到𠵱家都係做花旦,但係到今時今日都做唔到仙姐所要求嘅杜麗娘。」
近年有不少年輕一輩忽然對粵劇有興趣,她們作為資深的粵劇界中人,當然樂見這現象,阿嗲說:「希望年輕一輩多啲支持粵劇,始終粵劇係中國文化瑰寶,睇多啲粵劇,尤其係唐滌生啲劇本,佢啲文字真係好靚,睇完可以從中了解多啲中國文學。」寶珠姐亦說:「佢啲文采真係好好,好多人係睇佢啲戲去學中文,我都知道𠵱家好多走去學粵劇,覺得係一門藝術,我自己都希望可以繼續做落去。」

唔敢收徒

至於會否計劃收徒弟,她們兩人耍手兼擰頭地表示沒有資格,阿嗲說:「自己都希望學多啲嘢,學無止境麻,睇多啲其他劇種。」寶珠姐則說:「我自己都仲戰戰兢兢喺度學緊,點會講去收徒弟?真係提都唔敢提,不過最好都係多啲做,當係推廣, 最好政府可以俾多啲場地,我哋喺呢方面一直都好欠缺,當係支持吓!」
場地提供:Hotel Icon

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載