› 選擇地區
三藩市
紐約
洛杉磯
其他美國地區
香港 台灣 北美
 
2016年03月28日

古堡婚禮「希望似公主出嫁」
羅仲謙高呼太太 楊怡冧晒

新婚的羅仲謙和楊怡昨日終於由英國飛回香港,約下午3時半,心情大靚在機場笑住手拖手接受傳媒祝福,但現場混亂,擾攘5分鐘才能做訪問。
榮升羅太的楊怡左手無名指戴上巨鑽婚戒,估計主石約3卡,四邊鑲滿鑽石,sweet爆的她說:「呢啲嘢幾多卡唔緊要。」兩人不肯透露求婚過程,只說是在今年,楊怡感動到喊。問楊怡事前知不知?謙謙搶答:「知道我咪好失敗?」突然結婚是否奉子成婚?楊怡大反應謂:「唔係啩?咁快,我條腰今日好似22吋。」

在港補擺酒

問是否已簽紙註冊,他們說:「當去旅行,一行十幾人左右,希望雙方家長見面,有甜蜜、美好回憶。」兩人透露會在香港補擺喜酒,但未必會返圍村。問到當日愛的宣言?謙謙笑言:「講英文㗎喎,唔好啦,𠵱家講會甩甩漏漏。」謙謙解釋為何到英國利茲普城堡結婚:「因為我鍾意英國嘅古典氣氛,同埋我希望太太好似公主咁出嫁。」楊怡冧爆甜笑說:「多謝。」問到婚禮費用?謙謙說:「唔重要啦,最重要係令太太開心就OK。」
楊怡直言仍未習慣被叫羅太,問她與無綫續約成數時,她搞gag謂:「今年擺酒成數一定高。」是否趕生B?她說:「都唔係咁急啫,順其自然。」謙謙補充:「我太太都唔急我急乜嘢?」謙謙之後要出外開工,可擔心新婚就分開?楊怡說:「幾好吖,我唔使偷偷摸摸。」二人承認已同住,臨離開謙謙應記者要求錫了楊怡額頭兩次,之後一齊返將軍澳寓所。

返家後,楊怡立刻更新微博再放閃,貼二人手牽手的婚紗照並寫:「將踏入人生另一階段,謝謝你從此牽着我走……」胡定欣、胡杏兒等留言祝賀。之後羅仲謙回覆:「羅楊怡,謝謝你的愛。」
另外,讀者Man昨透過本報「爆相爆片」,提供一張羅氏夫婦等前晚6時許在英國希斯路機場的相片,Man透露他們乘坐的並非經濟客位。
採訪、攝影:黃曉妍、畢紹基、馮嘉銘、葉君海、黃曉程、吳耀輝、徐錦池

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載