› 選擇地區
三藩市
紐約
洛杉磯
其他美國地區
香港 台灣 北美
 
2016年04月02日

林嘉欣爭金像影后
圓大滿貫之旅

林嘉欣還差一女主角獎就圓成女演員獎項大滿貫。攝影:陳志嵐

【第35屆香港電影金像獎 明晚舉行】第35屆香港電影金像獎明晚舉行頒獎典禮,2002年、當年只有24歲的林嘉欣憑着處女作《男人四十》,橫掃台灣金馬獎及香港金像獎最佳新人及女配角獎,今年嘉欣再挾應屆金馬影后獎座,夥拍被她喻為lucky star的張學友,憑電影《暗色天堂》挑戰從未贏過的金像獎最佳女主角獎。同場成為嘉欣奪獎障礙的,是被視為「新人王」的春夏,黑馬本色來自她先後橫掃多個頒獎禮的獎項,大有當年嘉欣風采。場內為獎奔馳,場外春夏除獨愛街邊辣魚蛋,亦看好嘉欣可以完成獎座大滿貫(最佳女主角、女配角、新演員)之旅。
撰文:曹家誠、何永寧

相關新聞:春夏提名感謝郭富城

林嘉欣於24歲時拍了首部電影《男人四十》,結果於2002年橫掃了當屆香港電影金像獎和台灣金馬獎的最佳女配角和最佳新演員,之後嘉欣先後5度獲提名金像獎最佳女主角,可惜未能封后。
10年嘉欣下嫁導演袁劍偉後並誕下兩女專心照顧家庭,直至13年才再度活躍影圈,去年一口氣完成《百日告別》及丈夫首次執導的電影《暗色天堂》。她先憑《百日告別》拿下金馬獎影后,接着跟張學友合作的《暗》片中,分別獲金像獎最佳男、女主角提名。對於跟學友的再度合作並雙雙獲提名,她說:「學友真係我嘅lucky star,但我真係希望今次係學友攞,多過自己攞。」

最希望學友捧獎

第6度挑戰影后寶座的嘉欣,在電影中飾演基督教徒,故事涉及宗教及人性,題材偏鋒極可能是評審那杯茶,是丈夫為嘉欣精心打造的角色﹕「我有同導演講,如果你覺得我唔合適可以唔搵我,但佢話寫呢個角色時已經係打算由我嚟做,因為覺得我同角色有一個共通點就係天真又倔強,所以我好適合去演。」結果她的表演更贏得影后提名,她稱拍攝過程相當過癮:「我當時睇完劇本都完全預計唔到會點演,如果換着以前有呢啲不確定性會好驚,但𠵱家就反而覺得好好玩。」
雖然再度提名,連大熱之一的春夏亦看好嘉欣能夠完成首位大滿貫女星,但嘉欣坦言:「我係睇頒獎禮睇得好輕,坦白講,我結婚生小朋友前都可能仲有啲得失嘅心態,因為我得自己,所以淨係諗自己,所有嘢會focus落自己度,唔需要分心去其他地方,但當我結婚有小朋友後,心態已經唔同咗。」她就以春夏作例子:「舉例好似我睇春夏嘅《踏血尋梅》,見到新嘅演員出現感覺好新鮮,佢要全裸得來又咁自然,仲係佢第一套戲,好難得。好想互相鼓勵,我唔會用一個對手嘅心態去看待佢,希望佢好、希望香港電影好。

相關新聞:【鬥獎多】分頭搶獎

鼓勵老公搵女合作

丈夫首次操刀長片,但就未獲提名最佳新導演,嘉欣直言有替他感不值:「比較可惜係報名遲咗,角逐唔到新導演,不過即使冇份角逐,佢喺我心目中有一個重要位置,而且我鼓勵佢跟唔同演員合作,先可以豐富到自己視野。」
髮型:Hin Wan
化妝:Will Wong
服裝:i.t.
場地:香港萬麗海景酒店

【最佳女主角提名名單】

湯唯《三城記》
楊千嬅《五個小孩的校長》
張艾嘉《華麗上班族》
林嘉欣《暗色天堂》
春夏《踏血尋梅》

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載