蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月02日

亞視熄機 鬥氣冤家撐ViuTV開台
林日曦玩謝政壇元秋

【ViuTV開台】「戲劇人生終有日閉幕……」隨住擁有59年歷史的亞視昨日在大氣電波與觀眾告別,全新免費電視台ViuTV於下周三隆重登場。主打真人騷的ViuTV以毛記電視創辦人林日曦與「政壇元秋」蔣麗芸拍住上的《跟住矛盾去旅行》作重點節目。節目中林日曦當蔣麗芸透明拒絕交談,幕幕辣㷫政壇元秋場面,肯定為ViuTV帶來高收視。

相關新聞:【烽火四起】阿詩拗直疑雲

亞視熄機,電視業界進入新時代,新台ViuTV主打實況娛樂,當中《跟住矛盾去旅行》未出街已話題性十足,頭炮為立法會主席曾鈺成和社民連議員「長毛」梁國雄遊波蘭,於下周三晚上十時首播。另一集嘉賓林日曦與蔣麗芸則一齊去韓國旅行,五日四夜全程零交談。預告片已爆發火藥味,林日曦明玩蔣麗芸,要求傳譯員傳話:「幫我第一句同佢講早晨。」蔣麗芸冷笑說:「我唔知點同後生仔溝通。」傳譯員禁不住指:「咁好難搞喎!我!」

傳話員:氣氛唔好

夾在兩位「好難搞」的人中間做傳譯員的Viola,日前在柴灣接受本報專訪,大爆兩人在各種瑣碎事都出現分歧,她說:「我本身係節目製片,聯絡兼繙譯,導演突然叫我做埋傳話員,諗住冇乜所謂。點知佢哋真係連早晨同拜拜都冇講,因為林先生好堅持!」Viola直言第一次見面最尷尬,她說:「林日曦先生同我講佢嘅理念同實驗,佢覺得人與人有矛盾出現,可能係語氣問題,隔個人將語調轉一轉,睇吓會唔會好啲。」結果呢?她苦笑謂:「佢哋就好似一個好脹嘅波,一篤就會爆,照直傳話一定會有人唔開心,擔心節目都做唔落。」雖然現場氣氛麻麻,但Viola眼中,兩人好似卡通片Tom & Jerry這對歡喜冤家,她笑說:「蔣小姐好似大貓阿Tom,林日曦就似古靈精怪嘅老鼠Jerry。佢哋其實唔係敵人,只係Tom好鍾意捉住Jerry玩,無奈Jerry鍾意食芝士多啲,同成日走嚟走去,唔知遊魂咗去邊。」蔣麗芸為與林日曦好好溝通,多次試圖突破防線埋身,不成功就大聲說話,但林日曦都一於少理,激到蔣麗芸面黑。

相關新聞:洪卓立追港台劇睇女友

在立法會上有理冇理都大大聲說話的蔣麗芸,還有經常不自覺黑面的林日曦,Viola謂與兩人相處後竟有所改觀,她還爆林日曦好多說話:「佢成日喺我耳邊咿咿哦哦,有時嘴角少少戚,唔鍾意就皺眉,喜怒哀樂喺晒塊面度。」而蔣麗芸在鏡頭前後一樣充滿霸氣,她說:「佢係24小時全天候議員,無論任何時候都會諗點幫香港,乜事都會變『正』事,正經事個正。但佢又唔係好惡,對我仲幾好㖭,節目完咗有約我飲茶,好有大家姐feel鍾意照顧人。」

講到霸氣,蔣麗芸出發前已預先安排專車及入住高級酒店,以顯超然地位。Viola為她解畫:「因為蔣小姐有助理同屋企人一齊去,所以想自己一架車,而林日曦就跟我哋一齊坐旅遊巴。」問是否蔣麗芸自費?她說:「絕對係,佢仲自己book咗我哋附近一間酒店,貴少少啦。」除交通住宿,林日曦和蔣麗芸幾乎未試過同枱食飯,唯一一次是由Viola安排,她說:「食飯張枱好長,佢哋冇一齊坐,咁嚟到韓國,佢哋都要聽我介紹吓部隊鍋歷史。」最後一個問題,如果有機會選擇同其中一位去旅行,Viola會選擇邊個呢?她笑說:「如果真係要我揀,我會揀林日曦啦,因為有林日曦地方,件事會好玩好多,佢份人好細心,睇嘢好通透。」

郭偉亮盼有歡樂

ViuTV免費電視99台於下周三(6日)舉行啟播禮,已邀請Eric Kwok(郭偉亮)、陳奕迅、周柏豪、林二汶等撐場,Eric昨在電話中坦言從沒看過亞視:「我哋應該慶幸亞視咁多年都盡咗力,希望ViuTV可以帶多啲歡樂畀香港市民放鬆吓。」柏豪對亞視壽終正寢表示:「亞視一齊同香港人成長,都會有啲傷感。」二汶則說:「Viu開台希望多啲唔同類型節目有更多選擇。」
採訪:嵐山、皓騫、唐如

【五大矛盾】

矛盾位:價值觀
集數:共2集
旅遊地點:韓國首爾

林日曦和蔣麗芸零交流,林日曦曾在fb自爆蔣議員對其「實驗」完全不欣賞。從Viola口中得知的五件瑣碎事,能看出兩人矛盾有幾深:

【開台提提你】ViuTV今日可追台

ViuTV只可以在數碼頻道中看到,舊款未能接收數碼廣播的電視,必須配以機頂盒才能收看,其他高清電視則可以經重新追台收看99台ViuTV,觀眾今日起追台已可找到ViuTV。

方法一:自動追台

觀眾可於電視或機頂盒找到更新頻道的版面,以自動追台的方式,重追一次所有電視台,需時大約6分鐘,即可找到99台ViuTV。

方法二:手動追台

由於ViuTV在不同地區接收的頻度都有所不同,觀眾要先確定自己所屬地區,然後手動輸入相關頻道進行搜尋。例如東九龍至沙田及離島,要用CH22(482MHz),港島東及九龍東則用CH32(562MHz),灣仔及跑馬地區則是CH41(634MHz),其他各區所屬頻道資料,可於通訊事務管理局的網上文件中查閱。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載