› 選擇地區
三藩市
紐約
洛杉磯
其他美國地區
香港 台灣 北美
 
2016年04月02日

【烽火四起】阿詩拗直疑雲

《跟住矛盾去旅行》未出街已成熱話,除了夠娛樂八卦,當中還有幾對政界及教育界人士參與,花生指數極高。

相關新聞:洪卓立追港台劇睇女友

高皓正VS何韻詩

矛盾位:性取向
集數:共2集
旅遊地點:愛爾蘭都柏林

何韻詩公開承認同志身份,與虔誠基督徒「高教主」高皓正一齊去旅行,對宗教、性別、婚姻等存在好大矛盾。但原來兩人在2003年合作拍《尋找周杰倫》已認識,而且好老友。高皓正於電話中自爆陳年舊事:「我哋嗰時好啱傾,有日佢約我食飯,帶埋個女仔出嚟畀我識。我問番佢記唔記得呢件事,佢話唔記得,諗番轉頭,當時嗰個可能係佢女朋友。」高教主一度懷疑阿詩暗戀自己,他笑說:「因為佢仲問我覺得佢鍾意男仔定女仔,我話男仔啩,我仲以為佢鍾意我。」
高皓正已是兩個小朋友的爸爸,問有沒有與阿詩討論生育問題?他說:「佢未做媽媽未必明,我唔係同志都唔明,大家可以用唔同角度去認識對方。我冇聽佢提過想生BB,但知佢好鍾意小朋友。」

連詩雅VS葉蘊儀

矛盾位:不同年代
集數:共2集
旅遊地點:意大利佛羅倫斯

葉蘊儀轉型做藝術工作,常為社會不平事敢言,而連詩雅作為歌手,有不少包袱,葉蘊儀表示:「有乜嘢矛盾,一睇就知。我同佢唔同年代,我係70後,佢係80後,同一個我唔識嘅人去旅行,相處同習慣都好多嘢會好矛盾。大家有討論香港女仔被人標籤做『港女』嘅睇法,大家身份唔同,佢係歌手,做緊呢行會就住嚟講,有包袱,我就冇呢方面壓力。」
葉蘊儀透露拍攝期間,巴黎剛發生大爆炸,令其家人好擔心:「我喺意大利,屋企人好擔心,以為我喺附近,喺廣場拍嘢時候有個黑皮篋冇人認領,警察叫我哋疏散,後尾有人認領番,另一件難忘事就係睇晒三個真假大衞像。」

相關新聞:亞視熄機 鬥氣冤家撐ViuTV開台林日曦玩謝政壇元秋

曾鈺成VS梁國雄

矛盾位:政見
集數:共2集
旅遊地點:波蘭

立法會主席曾鈺成和社民連議員「長毛」梁國雄經常針鋒相對,想不到一齊去旅行可以如此溫馨。預告片上,曾主席跟長毛說:「你做聖誕老人,我做你隻鹿。」事後曾主席解釋:「識扮梗係扮鹿啦!」

戴夢夢VS邵音音

矛盾位:愛情觀
集數:共2集
旅遊地點:印尼峇里

一般以為後生的夢夢較開放?點知音音姐更大膽,夢夢說:「我鍾意男人幫我做腳底按摩,但男友詐型。音音姐就會話:『有冇搞錯!搵男人按咪搵男人按囉,最緊要舒服!』教我做女人唔可以冇信心。」

何君堯VS周庭

矛盾位:警民關係
集數:共2集
旅遊地點:日本東京

前學民女周庭與撐警律師、屯門區議員何君堯去日本拍攝。何君堯在fb貼上訪問片段,同時上載一則關於其女兒撐泛民及參加過佔領的報道,所以父女少溝通。未知對住周庭,他又會否像教女一樣?

海星老師VSAmanda Tann

矛盾位:教育理念
集數:共2集
旅遊地點:越南河內

以自然學習為本的逆流教師海星與活學教育創辨人Amanda,對教學有不同理念。兩人在越南見識當地教育制度,爆發連場「教」與「學」討論。Amanda總結:「任何能夠幫助學生學習的都是好的教育。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載