蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月03日

獨立宣言成最後畫面
劉錫賢轟亞視羞家 羅霖爆喊

【告別亞視】亞視前日愚人節熄機鬧出大笑話,最後節目《Miss Asia 25th 葡萄牙瑰麗巡迴》竟還未播完便突然sharp cut中止訊號,羅霖節目中一句「經濟獨立特別係……」為59年歷史亞視畫上句號。應《蘋果動新聞》睇亞視熄機直播的羅霖和袁潔儀,眼見亞視突然「拔喉」感到愕然和憤怒,按捺不住情緒齊齊喊爆,劉錫賢亦怒斥亞視說:「好羞家!」

相關新聞:前亞生返總台震波舞贈興

擁有59年歷史的亞視前日熄機,未有作任何特備節目告別,僅重播前亞姐羅霖和楊玉梅等於兩年多前主持的《Miss Asia 25th 葡萄牙瑰麗巡迴》與觀眾告別。有傳前晚熄機前最後一分鐘,畫面會顯示一張告別卡作惜別,但最終不但未有告別卡,就連該節目也沒播完,畫面呈現羅霖大頭說了一句:「經濟獨立特別係……」之後亞視突然中止訊號,近年來屢次鬧出笑話的亞視,最終也是爛尾收場。

「唔驚返唔到大陸」

《蘋果動新聞》前晚邀請了亞視前台柱林建明(大姐明)、羅霖、劉錫賢、蔡國威、歐錦棠和袁潔儀,於蘋果日報大樓出席《真熄亞視live》直播,一起見證亞視熄機。原本緊張期待倒數的大姐明,目睹亞視突然「拔喉」時愕然O嘴,袁潔儀、羅霖和劉錫賢忍不住落淚,齊齊鬧爆亞視核突羞家。
節目結束後,羅霖仍泣不成聲:「當我望住自己即刻sharp cut嗰刻,真係好意外,我唔知係光榮定乜嘢,只係覺得太唔專業。呢一刻我係唔知點樣去形容自己嘅心情,仲係未平靜到。我諗住起碼最低限度都有字幕升上嚟,又或者亞視有個logo,話咁多年多謝大家支持,呢個結尾都會好啲,而唔係我都未講完就cut咗,咁樣做一個結尾真係唔開心,真係一個遺憾,永遠都補唔番。佢(亞視)太過份,做嘢真係太唔專業,我明白亞視點解呢幾年會搞成烏煙瘴氣,我個心都成日希望亞視爭氣,點解臨尾都要咁!」對於亞視聲稱會轉戰衞星電視,羅霖說:「我唔會相信佢哋囉,佢哋成日都講大話,呢班人我唔會對佢有信心,乜嘢形式都唔會合作。」
羅霖的「獨立宣言」昨在社交網洗版,有網民指她是「港獨女神」,羅霖昨在電話表示強調網民解讀錯誤:「絕對冇政治立場,我啲朋友都問我,驚唔驚返唔到大陸?我梗係唔驚,我嗰句意思都唔係咁樣。我嗰句係講鼓勵女性任何時刻都經濟獨立,唔好依賴某一方而生活,絕對冇政治立場。」
亞視衰收尾,一眾藝人慘不忍睹,大姐明勞氣說:「由頭到尾都衰!佢貫徹始終!」劉錫賢怒斥亞視做法核突:「好羞家!證明咗一樣嘢,證明呢班高層喺度賴皮緊,因為佢哋一路以嚟,都係做緊賴皮嘅工作,佢明知去到零時零分一定要sharp cut,知道晒手頭上所有嘢,佢喺一個賴皮情況下播乜嘢?係介紹佢跟住一帶一路嘅廣告(指亞視突然加插未來發展訪問節目),然後先播Candy(羅霖)節目,如果你有啲良心就畀我播埋佢啦!呢啲咪一路以嚟賴皮嘅行徑囉!所以佢先至攞『拃』錢出嚟,又唔分畀大家就係咁解!」

相關新聞:盛品儒傷感:咁就冇咗

袁潔儀:風格似內地

袁潔儀亦鬧爆亞視羞家:「點向觀眾交代?呢啲風格就似內地,我哋明明睇緊啲嘢,佢走去sharp cut,我以為睇緊內地電視!」歐錦棠則怒斥亞視羞辱整個行業操守,對觀眾完全有欠尊重。此外,魏秋樺和陳綺明前晚出席有線直播節目時,亦為亞視「突然拔喉」傷心難過,當場落淚。
採訪:戴彩煥、何慧斯、唐如
攝影:陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載