› 選擇地區
三藩市
紐約
洛杉磯
其他美國地區
香港 台灣 北美
 
2016年04月07日

馮仁昭四圍超:
尹天照想爆粗 轟亞視爛尾 - 馮仁昭

尹天照當年有份演出嘅劇集《我和殭屍有個約會》曾經為亞視創下佳績,跟住佢返咗內地賺人仔,好少喺香港見到佢蹤影,前晚尹天照終於現身,佢喺九展出席電影《天堂奇癒記》首映,講到𠵱家佢嘅生活:「我一直都喺香港住,只係冇拍戲啫,𠵱家主要係登台。」佢仲話當年拍完《我》之後,有唔少內地片商搵佢拍鬼片,之不過佢信咗主之後唔再拍呢類題材,都推咗成六、七部。

「信咗主就祝佢好運」

話晒都係亞視一哥,阿照話佢都有睇亞視熄機,之不過好似唔多見佢出嚟講吓嘢,佢話:「呢啲嘢,久病床前無孝子,亞視話執都講咗年幾兩年,由最初唔開心到擔心,到最後都丟淡咗。希望亞視快啲出糧畀啲員工,好彩亞視冇爭我錢。」坊間唔少人鬧爆亞視嘅結局爛尾,阿照話:「世事冇嘢係長存嘅,總有終結,但係呢個方法唔係咁好。其實有啲前輩都係鬧㗎,如果我未信主我都會講幾句粗口,不過𠵱家信咗主就祝佢好運啦。」
至於無綫嚟緊會播映一套殭屍片,覺得題材好舊呢?阿照話:「冇乜所謂啦,拍啲乜嘢我就冇權過問,冇一樣嘢係你拍就好,人哋拍就唔好,冇人會諗到我呢個儍瓜扮一隻會飛嘅殭屍就紅咗,到今日我信咗主之後唔拍呢啲片,連我都預知唔到。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載