蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月17日

好戲派:80後熱血導演大膽作
《點五步》屋邨仔發圍

由新晉導演陳志發執導的《點五步》,借80年代一場不為人知的港、日棒球賽,講述一群屋邨仔奮鬥的故事。劇照

新一浪的電影新浪潮,已蓄勢待發。
一班新晉導演作品陸續登場,下一輪矚目的會是由現年27歲陳志發導演的作品《點五步》,以棒球為題材,講屋邨仔故事,找來廖啟智助陣。同期陳志發為ViuTV拍攝劇集《三一如三》,合作的有盧海鵬、溫碧霞,一帆風順的事業,儼如一套勵志韓劇。
在畫出彩虹背後,是陳志發跟拍拖4年的女友分手,而分手,總要在開拍後,理由簡單直接只是「想分開」。拍戲不夠錢埋尾,求人開工的辛酸,又唔通要話埋你知?
撰文:何永寧

暫定暑假上映

近日上映的電影《十年》、《樹大招風》等,題材或本土、或偏鋒不一而足,共通處是由一班年輕新導演操刀,甚有當年徐克、許鞍華等帶起新浪潮電影導演的風格。現年27歲的陳志發贏得政府商務及經濟發展局的「首部劇情電影計劃」,完成首部作品《點五步》,電影借80年代一場不為人知的港、日棒球賽,講一群屋邨仔的故事,勵志得來熱血,雖然棒球運動冷門,但在試映會及香港國際電影節放映時場場爆滿。
早前導演陳志發在太古城一場試映會舉行前接受訪問,留有一頭長髮造型,跟日本專畫棒球漫畫的作家安達充有幾分相似。陳志發被問到跟魏德聖監製早前上映的台灣電影《KANO》在題材上不謀而合,他解釋《點》片早在2012年就獲資助,在看報紙才知道有《KANO》這部片,他說:「本身係屋邨仔出身,好想拍一個屋邨仔遺憾嘅故事,做資料搜集時睇到一段新聞,講起沙田沙燕橋,原來有一段港日棒球賽嘅古仔,嘩,仲要嗰時沙田區政務專員係曾蔭權。」

女友難忍嗌分手

陳志發在浸會大學主修電影,獲大學教授推薦參賽,贏到200萬元政府全資的投資,還找來導演陳慶嘉及資深攝影師柯星沛擔任監製,便開始了創作的不歸路:「創作係孤單,同埋寫實人物好容易干擾到創作,好多之前自己想好嘅嘢要丟,真係剩番低嘅唔多。其實做資料搜集時,大量接收資訊都分唔到好同唔好,都係要多得監製引導,我先知邊啲有用邊啲冇。」
經歷大半年的自我放逐式寫稿,電影卒之開拍,就在開拍第2日拍了拖4年的女友提出分手:「冇乜理由,只係用WhatsApp同我講『想分開』。其實都feel到同估到點解,創作嗰大半年成個人封閉咗,好多嘢都唔理。其實女朋友有反映過,知佢頂唔順,但我個人沉迷咗就乜都唔想理。」戲還是要拍,陳志發還辭工專心拍好作品,不過200萬元要應付40組戲,當中有10多組動作場面,他說:「好多崗位都係靠一個舊人帶一班學生,好多人唔止under paid,仲有啲係no paid,自己都仲要貼錢,有段時間頂唔住都諗住放棄。」萬水千山電影在多場試片會爆滿情況下兼獲口碑,因為電影是政府全數投資,發行權要公開招標決定,他說電影面世那一刻有恍如隔世的感覺。

獲邀拍ViuTV劇集

陳志發半途出家讀電影,他之前曾在無綫工作,近日獲ViuTV邀請拍攝劇集《三一如三》,合作的演員有盧海鵬跟溫碧霞,他說:「古仔係改編作家南方舞廳嘅古仔,𠵱家ViuTV播緊套《瑪嘉烈與大衛》都係佢嘅作品,講當舖發生嘅古仔。都好多謝ViuTV咁信得過我,話晒之前喺大台都只係拍宣傳片同剪MV,拍完《點五步》冇耐就搵我。」他覺得幫ViuTV「打工」的好處是對方敢去試,他笑說:「我都敢搵就知佢哋肯試新嘢同大膽,呢間電視台自由度好高,自己亦放膽去試:「呢部係我首部執導電視劇,希望可以拍貼地啲,等觀眾有共鳴。」

真人真事:80年代沙燕棒球隊

《點五步》獲政府資助拍攝,故事改篇自80年代本港首支華人少年棒球隊——沙燕隊(圖)的故事。
故事講述1984當年,香港前途變天,同時沙田有隊少年棒球隊也經歷大變。在沙角邨長大的阿龍(林耀聲飾)跟細威(胡子彤飾)一個淆底,一個勇武,為邨中難兄難弟,也是band 5的中學同窗,完美演繹失敗者的命運。因為盧校長(廖啟智飾)的出現,令一切改寫。盧校長為改變壞學生,他決意成立沙燕棒球隊,招攬阿龍細威入隊,時而激將、時而地獄式訓練及參加國際賽作為誘因,令這班容易放棄的學生堅持下去。最後完成不可能的任務,沙田的沙燕橋亦以球隊而命名。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載