› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

【叫我宋仲基】《太陽》殘酷MK版
跌爛電話對望想車巴

【三個粉絲追韓劇】唉!神劇《太陽的後裔》大結局咗,令唔少粉絲都勁失落,未有新劇追,咪翻煲又翻煲,望住男神宋仲基先囉!

劇中唔少經典場面都將宋仲基打造成男神,例如喺醫院拍手「基」、同喬妹對望做發電「基」,仲幫喬妹綁鞋帶勁好心「基」,約會梗係做埋柴可夫斯「基」。如此一等一好男友嘅神級形象,令絲打們都話:「如果身邊嗰個係咁就好喇!」咩唧!做乜睇小香港嘅巴打們?其實佢哋要幾「基」有幾「基」,睇MK街頭大測試就知啦!

有MK巴打話,宋仲基拍電話嗰幕,佢想試好耐,仲話應該無難度,點知拍到部假電話散晒,連另一半都取笑佢話,「佢又唔係宋仲基!」不過,都有一位巴打勁好身手,一Take搞掂,成功拍走部假電話,從後面接返,連女友都大讚!仲要畀啲掌聲其他參賽巴打,喺旺角當街當巷不斷試、不斷拍、不斷跌爛電話嘅恆心和努力,試咗N次,大部份都成功!

宋仲基唔止好身手,仲係冧女高手,成日望實喬妹做發電「基」!各位情侶,你哋又有冇抽時間深情地望一望你嘅另一半,好好望清楚對方呢?無錯,又係當街當巷,要啲情侶深情對望,佢哋都話好少會咁樣望實對方,有啲一、兩秒就忍唔住笑,話「頂佢唔順」,有啲扭吓扭吓個頭咁捱到四、五秒,得一對夫婦胡生胡太,對望到唔嗌cut機都唔停,一啲尷尬都無!

最後一個測試係好心「基」,巴打們要跪低幫佢哋嘅「喬妹」綁鞋帶,啲後生情侶勁怕醜,耍手兼擰頭,就算肯綁鞋帶都無跪,唯一一對結咗婚超過廿年嘅夫婦做到足,丈夫Nelson一啲都唔介意大街大巷跪低,太太Tracy係咁甜笑勁冧,比較之下,Nelson真係「仲基」!

主持:動主播阿仙
攝影:陳家文 廖達燊

《太陽的後裔》片段由Viu提供:
https://goo.gl/RixIDX

【三個粉絲追韓劇】
http://hk.apple.nextmedia.com/enews/animation/kfans/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載