› 選擇地區
三藩市
紐約
洛杉磯
其他美國地區
香港 台灣 北美
 
2016年04月28日

【add】紅人主場:
欣宜 勝利曲線

有一把靚聲的Adele當上國際級天后,有喜劇細胞的Rebel Wilson成為荷李活影壇搶手貨,擁有常人眼中叫肥嘟嘟curvy身形的她她她,絕對是人生勝利組!宣佈不再減肥的鄭欣宜去年一首《你瘦夠了嗎?》獲不少網民讚好,今年再接再厲,推出新歌《女神》,宣揚人人也是女神的正面訊息,這份自信光采,向社會審美標準的正面逆襲,也算是擺出一種勝利姿態吧!

統籌:林妙萍
造型及撰文:趙潔恆
攝影:郭賢興
錄影:林德雄、陳志嵐
化妝:Samuel @江中平化妝室
髮型:Milk Chan & Morris Ko @ Xenter

鄭欣宜個性又爽又直,甫坐下即問她可否讀出一些網民留言,她想也沒想就一副放馬過來的樣子。看到對自己尖酸刻薄以至是人身攻擊的評語,欣宜聳聳肩:「其實都慣,同埋啱啱讀嘅都係關於肥嘅,都冇新意啦!其實呢啲說話唔會令我肉酸,反而係講嗰個人肉酸咋嘛!」不用看牌品,欣宜示範何謂EQ高,修養好。

怕被批不專業

欣宜從不迴避大眾對她的批評,反而想從中知道自己有甚麼地方可以幫到自己改進。「以前都會成日focus唔好嘅comments, 我以前好介意,我做每一樣嘢,我嘅髮型、我着嘅衫、我化嘅妝,都好似係為咗要討好人。但係慢慢分清楚邊啲係攻擊,邊啲係對我好。朋友成日叫我唔好睇,但係我一定要睇,因為我作為artiste、歌手,我就係product,而觀眾聽眾就係customer,我要知道佢哋點諗先可以做好我呢個product。」欣宜再難聽的評語也不怕,最怕反而是別人說她不專業、是敗家女,「話我工作唔專業咁講我最hurt!以前最憎俾人話我係星二代,但之後有一個moment開竅,的確唔係因為我爹哋媽咪,冇人知道我係邊個,但係我都明白咗係因為佢哋我先有機會,都唔代表我會一直有機會,繼續有機會係要靠自己。」

為自己唱好歌

欣宜曾經有段時間不想再留在娛樂圈,「當時覺得望唔到前路,話大家唔認得我咩,唔係,但噏唔噏得出我做乜,又好似冇人知道原來我係唱歌嘅,嗰時唔識諗,覺得出event又冇fans支持, 唔知為乜。」後來欣宜想通了,簽了蕭定一的公司,覺得既然有這個second chance,就要為自己唱好歌,「我唔係要個fans club有好多人,我唱歌係因為我真係好鍾意唱歌,我相信係我嘅音樂帶到啲message出嚟。」最近欣宜發表新歌《女神》,由殿堂級填詞人黃偉文為她度身訂做的歌詞,深深令她感動,「佢想講每一個人天生就有一種獨有氣質、光采,但如果我哋俾個社會影響咗,就冇咗嗰一道光,佢想同我講要信自己,所以我都想同冇信心、對自己形象低落嘅人加油!提醒佢哋你係女神嚟㗎!」

三十歲諗結婚

歌唱事業之外,欣宜都忙於拍攝新片《29+1》,戲內戲外都經歷女人三十關口,都有少少危機感閃過,「其實我又唔係好介意三十歲呢樣嘢,年齡唔係一個問題嚟,如果我有皺紋,我會:『Yeah!我成日笑所以我有皺紋呀!』『白頭髮呀我有人生經歷呀!』拍呢套戲係會逼你面對一啲事,我又發現,係喎我今年又要做三次姊妹,係咪要諗吓結婚生仔呢,但係我男朋友都未有,又冇得諗嘛。」

笑住回應惡評

網民惡評:好肥膩呀!睇完慳番餐午餐!
欣宜回應:多謝你!

網民惡評:啲相有味,好大陣豬肉味!
欣宜回應:咦!你個電腦mon喺邊度買?有4D嘅?

網民惡評:美人魚? 點睇都似發脹咗嘅浮屍囉!
欣宜回應:其實呢輯相的確唔係我favorite,原來喺水中影來唔容易。平時影相我都幾為自己驕傲即使咁嘅身形喺鏡頭前都好自在,仲發揮得唔錯,如果我係一個又高又瘦又靚嘅女仔,我絕對有做top model嘅潛質。

想搞內衣生意

欣宜年前創業開曲奇網店,有傳開pop-up store賺了近百萬,變身商界女強人。原來除了賣曲奇,她還有興趣搞內衣品牌,「一啲加大碼內衣,樣樣嘢都係睇你嘅structure做得好唔好,整曲奇要個餅底做得好,起樓要打樁打得穩,所以我覺得着衫要你嘅內衣啱身稱身,着衫上去先靚。」
欣宜對穿衣都有要求,「好多人覺得肥人一定要着鬆身衫,但我就唔同意,着鬆身衫只會顯得你更大嚿,我覺得應該要play up your curve,我鍾意着貼身啲嘅衫。因為肥人條腰好難搵得到,最近好鍾意高腰pencil skirt,可以凸顯腰線。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載