› 選擇地區
三藩市
紐約
洛杉磯
其他美國地區
香港 台灣 北美
 
2016年05月13日

我主場:悼念變笑話耿耿於懷
連詩雅最想抹走RIP

連詩雅(Shiga)15歲出道做模特兒 ,2010年轉做歌手繼而再拍電影,6年來圍繞她的新聞離不開爛玩、蒲精,最近「連詩雅」三個字在搜尋引擎再次熱爆,全因她與上代女神葉蘊儀拍ViuTV節目《跟住矛盾去旅行》後,被狂插說話經常中英夾雜兼有「ABC港女腔」。忽然萬箭穿心,難得Shiga樂觀照單全收,冇後悔去了一個不一樣的「旅行」,反而對串錯字耿耿於懷,Shiga笑言如果時間可以逆轉:「我唔想串錯字!」
撰文:草津
連詩雅是家中獨女,自小萬千寵愛在一身,讀國際學校,與外國人溝通絕對不成問題。不過,Shiga早前在《矛盾》中不停講單字英文,被網民嘲笑是「ABC港女腔」,被拍檔葉蘊儀藐爆。昨日Shiga在中環接受本報專訪,已將英文用語減到最低,並大方表示不介意:「講真,其實冇諗太多,因為港女、女神、盛女太多標籤,咁每個標籤準則又係點?所以唔係介懷呢啲新聞,多人留意,先有咁多comment或者迴響。」是否被葉蘊儀嫌棄?Shiga說:「我哋雖然冇交換電話,但拍攝過程好愉快,拍完之後都有私下傾偈,所以我一直都話剪接真係好犀利!」

錯開有條路

反而Shiga好後悔當年在Instagram悼念荷李活電影《狂野時速》(Fast & Furious)系列男星保羅獲加(Paul Walker)時,竟然將Rest In Peace的Peace寫錯成Piece,被人笑足年幾。如果可以回到過去,Shiga最想抹走寫錯字這件事:「其他嘢好多外來因素,好難解釋,但呢個真係最可以避免到,同埋真係自己論盡,呢個係𤷪自己嘅。讀書時代已經成日寫錯字,阿媽都成日鬧我點解可以咁大頭蝦!」

擇偶口味變

人紅自然是非多,Shiga最近被翻舊賬,被揭15歲未熟時曾拍過4次拖、影過性感寫真集,更在短短4年間連𠝹19仔,包括曲赤、關楚耀、王浩信、楊愛瑾現任老公郭永淳等,戰績彪炳。Shiga笑着回應:「好搞笑,其實15歲講嘅puppy love,係連5歲拖手仔嗰個都計埋,𠵱家梗係唔會計啦!」她昨日她再數數手指,透露15歲至27歲只是拍過兩至三次拖。
Shiga曾透露喜歡陳冠希(Edison)類型男,如今剛失戀,擇偶條件是否不變?她說:「當然有變,當時15歲可能比較少女、天真,𠵱家覺得最緊要溝通得好同合眼緣。」

媽咪勸辛苦唔好撈

連詩雅由初出道的乖乖女形象,後來接拍《夜蒲》系列電影,問到可擔心被定型?她說:「冇諗咁複雜,我諗嘢較單向,無論電影或乜嘢影響都好,我發覺連詩雅個名就容易啲引起話題。」有否想過改名?Shiga說:「又冇喎,冇大家諗到咁大打擊同影響,因為我明白除非唔做呢行或人哋唔再關注你,否則一定有新聞。」
那又有沒有想過放棄娛樂圈?Shiga說:「冇,只想學習去習慣,新聞唔會影響我最大,影響我反而係工作。」她很感激媽媽鼓勵:「好幾年前媽媽有講過一番感動說話,叫我如果辛苦就唔好做,媽咪會諗方法撐起頭家。聽完好感動,覺得唔可以咁易放棄,做好工作畀更好生活環境媽咪。」Shiga笑言最近被同事取笑,她的新聞如新歌一樣《血一般紅》。

髮型:Kate of Hair culture
服裝:ROCOCO, RUE MADAME
場地提供:Tycoon Tann

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載