› 選擇地區
三藩市
紐約
洛杉磯
其他美國地區
香港 台灣 北美
 
2016年05月13日

被指約滿摺兩舖
阿徐:啋過佢!仲頂得住!

徐濠縈09年同生意拍擋Dorothy搞時裝生意,開舖搞時裝店Liger,有聲有色,生意至今擴充到有銅鑼灣、尖沙嘴K11有舖,同代理嘅redline飾物店就喺海港城同澳門都有兩間舖。

自由行遊客大減,零售市道步入寒冬,好多國際大牌子好似Valentino、Prada都要減價促銷,昨日就有報道話阿徐嘅時裝生意都有受影響,仲講到佢哋裁員減薪,尖沙嘴同澳門舖幾個月後約滿後就會結業。《蘋果》就搵咗阿徐問呢件事,佢第一句就話:「啋過佢!唔覆佢,就亂寫。」

阿徐承認做零售係艱難時刻:「我都唔想回應,o依家做零售係艱難時刻,但仲頂得住,捱緊囉,仲知大家都捱緊啦,用對眼去睇,我唔想逐一去回應,冇啲咁嘅事。o依家啲舖頭仲喺度,咁我哋舖頭都好多嘢發生,又會轉display,有活動。」

至於兩舖幾時約滿?阿徐話:「仲知未有耐約滿,冇一樣嘢係幾個月約滿,仲有一段時間,將來嘅事將來嘅嘢冇人知,當然我希望大家係捱到落去。」

阿徐不嬲都鍾意喺ig貼自己生活同潮人打扮相,但被指佢頻頻post自己舖頭牌子促銷做宣傳,佢就表示:「我都成日post嘢,我post自己啲嘢,亦都有post人哋brand啲嘢,有幾出奇?」市道差令各大行業都要捱共度時艱,阿徐表示會正面捱落去:「我keep住用自己馬拉松精神,盡量都會堅持落去,唔須要其他人嘅幫手,我嘅精神都擺咗喺度。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載