› 選擇地區
三藩市
紐約
洛杉磯
其他美國地區
香港 台灣 北美
 
2016年05月22日

爆Seed鍾意男仔 嘲CY唔認錯
志雲擺敏之上枱 勸離TVB

阮兆祥前晚在灣仔伊館舉行《硬食放題棟篤笑》首場,陳法拉、樂易玲、關楚耀與韓籍女友Miu Kim等撐場。一開場,祥仔扮花姨展示心口兩個螢光波波,玩盡娛樂圈及時事熱話,包括689、永恒亞視、方力申和Stephy分手、城城媾嫩模Moka以及G.E.M.的大媽尿片裝都照玩,又以「貧窮富珍」身份力證李國章講大話唔眨眼,噱頭十足。
志雲大師粉墨登場,先扮已故舊老闆邵逸夫爵士,再與扮黎明的祥仔Chit Chat,祥仔講金句:「睇4D演唱會就好似撞鬼咁,要講緣份㗎,信則有,不信則冇,有啲人睇多啲啲,有啲人睇少啲啲囉,睇完ABC,一定見到D嘅!」志雲即說:「你唔好講ABC呀,呢輪好敏感,因為Anyone but CY。呢句話因為明明錯咗又唔認,而你處理所有事嘅公關技巧一流囉,你啲技巧喺邊度學㗎?等我哋嘅行政長官都學吓啦!」

「我揀男仔得唔得」

志雲見觀眾好反應,忍不住說:「如果CY嚟到真係唔會咁多掌聲!」之後志雲再扮白韻琹講說話,又讚汪明荃揶揄港鐵主席馬時亨。其間祥仔和志雲表示要捉兩個台下觀眾上台玩摩天輪,祥仔先捉伍詠薇,志雲說:「我鍾意男仔,我要揀男仔得唔得先?」但最後都捉了舊將陳敏之,志雲逼供:「你哋幾時離開TVB呀,唔使傾啦!」見兩人冇出聲,大師續說:「乜你哋有言論限制嘅咩?」伍姑娘說:「我8月已經離開咗無綫啦!」大師繼續抽水:「無綫最近有套《殭》劇,但係收視未如理想,監製話觀眾水平低,我就想話呢,驚我哋攀唔到咁高,唔知幾時先睇到你。」一直冇出聲的陳敏之回答:「哎吔!師傅你唔好玩我啦!」大師最後說:「TVB啲確其實幾好睇嘅!」未知是否曲線!?

望發放正能量

去到尾聲,祥仔感觸地謂:「香港好似好多嘢都失去咗咁,好似公屋冇咗啲士多,香港人亦都好似冇咗將來,冇咗自己,冇咗自由。今晚其實我有個訊息想帶畀大家。」 說罷即唱《前程錦繡》勉勵大家,全場一起拍和,與祥仔一齊參加新秀歌唱的張衞健則擔任壓軸表演嘉賓。完騷後,祥仔表示希望藉這個騷發放正能量予香港人,他說﹕「正如Leon(黎明)話齋思想價值係會植入個腦,所以將開心植入畀大家個腦。」他表示不擔心Leon和城城會嬲,亦不覺敏之會尷尬。問到Dicky看好他三年內在紅館開騷,他笑說:「進軍紅磡殯儀館咩!不過好多棟篤笑嘅奇才,譬如黃子華、張達明等,都係由伊館開始,等我儲多啲觀眾先再算。」
採訪:王連連
攝影:陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載