蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年05月24日

【馮仁昭四圍超】
麥明詩服侍林作踢波

麥明詩早前喺無綫節目度成日將「劍橋」同「十優」掛喺嘴邊,結果俾網民幫佢起朵叫「堅離地詩」,而佢最近以新丁待遇幫無綫拍劇,成日要留喺內地,前日趁有假期即刻爭取時間陪住男友林作,就連男友同成班男人去踢波都照跟,仲唔介意做阿四,幫男友同佢啲波友買埋水。

揀一件頭泳衣

前日下晝4點鐘左右,麥明詩坐男友林作車去九龍仔足球場後,即全程靠邊站,後來索性搽蚊怕膏趴喺草地睇書,完場後先同男友過二人世界,仲好貼地咁去九龍城食茶餐廳,又去銅鑼灣行樓上舖。馮仁昭噚日打電話畀林作,佢話:「噚日其實都幾曬,都驚佢(麥明詩)曬親,不過佢平時冇乜做運動,有機會畀佢接觸吓大自然都係好嘅。」
馮仁昭笑佢哋慳家,一份常餐兩份食,仲去街檔睇手機殼,林作即乘機幫女友澄清咁話:「佢好鍾意食茶餐廳㗎,喺街邊買手機殼,因為嗰度多款嘛!」問佢係咪好保守,所以麥明詩揀泳衣只揀一件頭,佢就笑住話:「我唔介意佢着三點式喎,咁好嘅嘢、靚嘅嘢,梗係要攞出嚟分享啦!」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載