› 選擇地區
三藩市
紐約
洛杉磯
其他美國地區
香港 台灣 北美
 
2016年05月30日

全程走音甩嘴自評100分
FFx MK騷 九成空凳
「乜低潮未經歷過」

香港4人女子組合FFx前晚於旺角麥花臣場館舉行首個售票演唱會,容納3,500人的場館,開騷前兩星期FFx開心宣佈已售出8成門票,但前晚入場只有300幾人。雖然九成空凳,但觀眾反應尚算熱烈,FFx全晚甩嘴走音亦照單全收,四位成員更慷慨給自己100分,FFx說:「我哋有乜嘢低潮未經歷過吖?」果然充滿正能量!

相關新聞:【騎呢彈起】900蚊MV吸310萬點擊

踏上舞台開騷是每位歌手的夢想,對4人女子組合FFx而言亦不例外,雖然成名曲《Sugar Baby》MV曾被彈拍攝手法、服裝、化妝、舞步均全錯,但偏偏令她們在網上爆紅,MV至今在YouTube的點擊已達310萬;然而返回現實世界,FFx前晚在旺角麥花臣場館舉行首個售票演唱會,門票分別索價380元、280元及180元,惟入場觀眾只有300多人,九成空凳。

男歌迷讚好有朝氣

面對僅一成觀眾,FFx成員楊澤怡(Shirley)、潘穎琳(Mizaki)、周葆諭(Christy)及李詩詠(Ceci)仍落力演出。以銀色戰衣打頭陣的FFx獻唱《Sugar Baby》,然後再唱新歌《MK Pop》,4人全程表現high爆,除用英文向台下300多位觀眾高呼:「Put your hands up!When I say FF,you say X!」又向山頂的空凳大叫:「山頂嘅朋友,嗌大聲啲!」
由於FFx僅得《Sugar Baby》、《MK Pop》及《見面禮》3首歌曲,演唱會要由晚上8時半撐到11時,除唱兩次《Sugar Baby》外,還要唱其他歌手的歌「攝」時間。FFx越級挑戰唱林憶蓮的《至少還有你》、鄧紫棋的《Where Did You Go》及鄭秀文的《信者得愛》,但經常出現走音兼甩嘴情況,幸入場觀眾照單全收,不停揮動螢光棒及舉字牌表示支持,Shirley自彈自唱有份編曲的新歌《一生一世》更贏得不少掌聲。現場一位男歌迷Sam哥,強調花280元購票入場,他受訪時說:「覺得佢哋好有朝氣,我最鍾意佢哋solo跳韓國K-Pop嗰part。」對於FFx的表現,Sam哥表示:「其實佢哋擺脫咗MK,𠵱家韓國啲,今晚我會畀80分。」

相關新聞:【另類出位】夏蕙姨搞生前葬禮

「巨星都有進步空間」

完騷後FFx受訪被問對入場人數僅一成可有失望?幾位成員異口同聲說沒有:「唔會!由MV到𠵱家開到演唱會,我哋已經好滿足,有乜嘢低潮未經歷過吖?」有指她們走音及甩嘴,FFx卻給自己100分:「分數係畀支持我哋嘅朋友,每個人都有進步嘅空間,天王巨星都有進步嘅空間啦!」FFx續謂:「你哋可以上網睇番,啲飛係真係賣晒,啲飛喺贊助商嗰度。就算只得一位觀眾,我哋都會做好表演。」FFx經理人Sam則說:「贊助商係真金白銀贊助,現場有300幾人喎,台下fans睇得開心就OK!」
採訪:盧妹
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載