› 選擇地區
三藩市
紐約
洛杉磯
其他美國地區
香港 台灣 北美
 
2016年06月02日

動搞作:派水向草根致敬
Kevin Boy明哥高呼:香港加油!

香港地,有人可以打機打到冇停手,但有更多更多的人,靠一雙手養活一家幾口。在ViuTV《晚吹──真PK》中,除褲露股夾乳頭非常出位的李健宏(Kevin Boy),近日除推出新歌向一班靠雙手搵食的香港草根致敬,又走到街頭向清潔工人、補鞋伯伯等送水送紙巾,又親身向深水埗明哥取經,齊齊講聲「香港加油」!
撰文:魯吉

既是ViuTV《晚吹──真PK》主持、歌手和樂隊LMF鼓手的Kevin Boy,近日推出個人新歌《我最喜愛的香港人》,向一班有骨氣靠自己雙手搵食的香港人致敬。不過,KB不單「得把口」,日前他還與《蘋果動新聞》走勻石硤尾、深水埗和旺角,向一班草根送水送紙巾打氣。

士多香港特色

這天,KB專程走到南山邨小士多幫襯伯伯買水買紙巾,他說:「呢啲士多仔係香港比較特色嘅嘢,同埋伯伯係第三代,真係由細做到大,同埋呢啲真係香港人嘅特色,所以特登嚟幫襯番佢。」當日KB先後向廚房師傅、推車伯伯、執紙皮婆婆、清潔工人、地盤工人、補鞋伯伯、的士司機、報紙檔婆婆送水送紙巾打氣偶爾有一、兩位公公婆婆被KB的紋身嚇怕,以為他另有所圖而請食檸檬。
KB還走到深水埗北河燒臘飯店向經常派愛心飯盒的「明哥」陳灼明送水致敬,大讚明哥是隱世英雄,自己全因明哥啟發去做好事。明哥笑說:「做呢啲嘢最緊要用個心去做,自己有幾多力咪幫幾多囉!」最後二人還齊聲講「香港加油!」希望將正能量傳揚開去。

幫人開心滿足

忙了一整天的KB,順利完成任務後直呼開心滿足,他說:「開心係做小小嘢送一支水一包紙巾,都可以換嚟一個笑容。我都會叫番多啲朋友留意番呢啲嘢,喺你自己範圍去幫到人已經係好好。大家互相幫忙互相尊重,唔好理你做乜工作乜嘢階層。」但有人被他的紋身嚇親,KB笑說:「都有㗎!但好難怪,始終思想較保守,可能我平時畀人印象都係玩,係整蠱人,今日能夠拍一啲我好想拍嘅嘢,令到人開心,係一件非常滿足嘅事。有時送句『你好嗎?』或者『辛苦晒!』、『加油』咁,已經好足夠,學明哥話齋,最緊要攞個心出嚟!」

整蠱人聞名

現年40歲的李健宏(Kevin Boy),是樂隊LMF鼓手,2011年開始推出網上整蠱人節目《情義兩難全之玩爆你個腎》大受歡迎,連無綫節目《玩嘢王》亦被指是向他偷橋。而一向愛玩的KB,甚至試過街上裸跑,認真癲狂,至近期KB跳入免費電視,與導演火火為ViuTV主持《晚吹──真PK》,大玩露股夾乳頭啜腳指,挑戰電視尺度,並成功出位。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載