蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年06月11日

靚模 師奶 紋身女 爭入圍
天使魔鬼 ViuTV開戰

【ViuTV發圍】
今年兩台「選美激戰」爆發,無綫港姐首輪現身佳麗遭大起底,昨日輪到ViuTV的選美節目《美選D.n.A.》的參賽者在柴灣進行面試,質素有如大會主題Devil(魔鬼)與Angel(天使)結集,十一名參賽者中有三位來自同一間模特兒公司的索女,入圍機會高;而目測的「Devil」人選,包括有42歲師奶、有十幾個紋身的金毛女、嫩版小儀等,令人眼界大開。

相關新聞:ViuTV選美阿太候選人曾與李璧琦同屆選校花

香港靚女有幾多?近日無綫與ViuTV兩台的選美活動打對台,ViuTV的《美選D.n.A.》截止日期為本月22日,昨日首次在柴灣進行面試,十一位參賽者分批到場會見節目監製。天使與魔鬼化身各佔一半,當中最矚目可說是「索模三人組」余逸思(Yoshi)、方敏婷(Natalie)和張沛樂(Charlotte),她們同樣來自Pure模特兒公司。

「呢個選美貼地啲」

現年24歲的Charlotte曾拍過天堂鳥MV及NowTV聖誕節宣傳片等,她「事業線」好強,經常在Ig貼泳裝相大晒34D激凸上圍,昨日穿上一件白色低胸圓領衫現身,她說:「大家可以叫我沙律醬,一直覺得港姐選美壓力比較大,自己冇乜意欲,今次知道有呢個選美覺得幾有興趣,貼地啲,唔係睇錢、睇學歷。」22歲的Natalie則擁有33C上圍及雪白美肌,剛在恒生管理學院英文系畢業,她說:「我唔係高材生,今次只係任務形式去玩,幾有趣,上山下海都冇問題。」還有23歲的Yoshi最愛在Ig貼跟男友的攬錫相,她說:「男友係健身教練,我諗太性感佢都唔想。」
講完Angel,當然要數Devil化身,外貌有點似「細哨」,現年25歲、全身有十幾個紋身的金毛紋身師自稱叫「大狗」,她曾任《新報》副刊攝記,早前在拍ViuTV另一個未播出街的求愛真人騷《脫「獨」工程》(暫名)前已找到男友,所以轉戰參加選美。而「歪面李若彤」Catherine和目測與DJ小儀差不多高的Jennifer亦有做模特兒經驗,Jennifer說:「知道自己身高比較矮啲,希望呢邊可以多啲機會。」

曾選校花輸畀李璧琦

由於今次美選只需年滿16歲及不論婚姻狀況,昨日年紀最小的只有19歲、仍是中學生的黃嘉儀,戴住大眼仔與記者對談:「嚟之前有同學校訓導老師同屋企人傾過,大家都贊成,我覺得機會係留畀有準備嘅人。」而最年長的Vanessa今年42歲,報稱是一名家庭主婦及撰稿員,她說:「貪得意,有個8歲大嘅囝囝,十幾年前參加過大專校花選舉,李璧琦係冠軍。」問自覺有甚麼優勝之處?Vanessa稱:「我都唔知有乜準則,又天使、又魔鬼囉!」
部份參賽者中都「熟口熟面」,除「牛雜妹」李美琪外,曾捲入裸照風波及割脈企圖自殺的伍淑怡(YoYo)都有前來面試,聲稱一個月減20磅的牛雜妹身形依然略胖,透露是ViuTV邀請面試,問是否內定入圍?她說:「未必㗎!我相信選美係公平、公正,唔係今日都唔係嚟面試。」YoYo則說:「我已經重生咗,加上呢個係新台,好夾。」
採訪:盧妹
攝影:陳志嵐

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載