› 選擇地區
三藩市
紐約
洛杉磯
其他美國地區
香港 台灣 北美
 
2016年06月20日

各自度身訂做個唱
Sammi戒口 城城玩黑舞士

天后鄭秀文(Sammi)與天王郭富城昨日各自為演唱會開記招,Sammi 9月的8場演唱會今日開賣,她昨在尖沙嘴記招上,提到已有不少南亞裔排隊黨:「次次都好似有咁情況,聽聞『行』晒床褥出現,其實賣飛制度,每人買到四張,今次排啲人機率高啲。」Sammi表示未諗加場:「暫時未諗,要保持質量,呢啲係體力勞動,能量消耗好多,我會keep fit,食有營養嘅嘢,挑戰自己。」

笑安仔要反省

對於日前老公許志安與黎明的陳年合照在網上瘋傳,被笑似戒毒人士及智障兒童,Sammi認真地指會傷害及不尊重有關人士:「但純講笑嚟睇,佢要反省吓,佢自己睇都笑啦,所以有情人眼裏出西施,我有笑佢發育不全,後生嗰時似笠咗絲襪出街,越嚟越年長,五官就開番。」

城城昨日則以「黑舞士」造型在圓方開記招,將於8、9月開12場演唱會,製作費高達5,000萬。城城表示會打造超智能式、有思想舞台:「個舞台好似一個黑洞,會走出一個黑舞士,有大量科技,唔知保險費受唔受保。」問城城會否擔心個唱似Sammi般被黃牛黨炒飛,他表示已交給工作人員處理:「我理唔到咁多。」會否叫女友方媛(Moka)捧場?城城說:「睇時間啦,佢籌備緊佢嘅服裝品牌,咁多場,順其自然啦!」

扶兩老去食飯

此外,Sammi與安仔昨晚偕父母到銅鑼灣西苑食飯慶祝父親節,但二人就分開到場,安仔負責駕車接載兩老,並體貼地扶兩老落車後再前往泊車。
採訪:王連連、黃曉妍、畢紹基、吳耀輝

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載