› 選擇地區
三藩市
紐約
洛杉磯
其他美國地區
香港 台灣 北美
 
2016年06月21日

合唱《愛我別走》攬實老婆
洗米華:得一個周太 整喊洗米嫂

澳門賭業猛人周焯華(洗米華)為享齊人福,引爆正印陳慧玲(Heidi)和小三Mandy Lieu的激戰,原本隨着Mandy懷第二胎兒子,洗米嫂心死嗌離婚落幕,然而,前晚洗米華出席生日飯局,深情攬實洗米嫂高唱《愛我別走》,當眾許諾:「我只得一個周太!」台下賓客吶喊起哄,洗米嫂感動到爆喊,不過,據知洗米嫂依然企硬離婚,不肯原諒出軌老公。

相關新聞:陪Mandy洗米華藐嘴

混血名模Mandy Lieu懶理小三之名,介入周焯華和老婆陳慧玲的婚姻之中,糾纏兩年的「爭米戰」好戲連場,隨着去年尾洗米華高調跟Mandy十指緊扣現身,洗米嫂終於死心搞離婚,而Mandy亦傳出為洗米華懷有第二胎兒子,正當大家以為小三Mandy有望坐正之時,卻傳出洗米華一直未肯簽紙離婚,前晚更驚爆一場正印反擊戰,洗米華在派對上緊箍老婆求復合,Mandy入宮做周太危危乎!

股東起哄嗌復合

據知,前晚洗米華在澳門出席旗下太陽城的某位股東生日派對,洗米嫂及兩人所生的大女周梓潼亦在場,當時洗米華在台上唱張震嶽的歌曲《愛我別走》,成班股東都推洗米嫂去老公身邊,拿着咪的洗米嫂尷尬合唱,朋友起哄大叫:「復合有望」、「好嘢,冇事啦」、「破鏡重圓」,洗米華更借勢兩手攬實洗米嫂,一面陶醉地唱歌,還當眾大大聲講:「我只得一個周太!」全場拍爛手掌,半醉的洗米華以為箍掂老婆high到跌低,台下大叫:「扶起你老公!」洗米嫂即澄清:「係朋友。」洗米嫂挨着老公的肩膊激動爆喊,洗米華緊擁着她風騷唱歌。
據有份出席派對的知情者透露,當兩人落台後,在場多位董事太太都圍着洗米嫂,紛紛勸她不要離婚,不過,洗米嫂卻沒有答應,她的閨中好友向本報表示:「洗米嫂話堅持要離婚,因為呢個傷害太大,只會當佢係囡囡嘅爸爸,家人看待。洗米嫂噚晚喺洗米華懷抱爆喊,並唔係原諒咗出軌老公,而係因為現場好多朋友都撐佢,當時台上台下好多人都大嗌:『我哋只係認一個周太,就係你!』」

相關新聞:【爭米】洗米嫂Mandy過招

Bob:群情好洶湧

而擔任派對司儀的林盛斌(Bob)昨接受本報電話訪問時表示:「有朋友拉Heidi上台,當時華哥唱緊《愛我別走》,大家嘻嘻哈哈好開心,朋友仲叫佢哋合唱。」問到洗米嫂是否激動到喊?Bob說:「我見唔到喎,佢可能有少少尷尬,當時華哥都有少少醉意。Heidi都有一齊唱歌,張耀揚都喺度,呢首係張耀揚嘅飲歌,大家搞氣氛,群情都好洶湧。」洗米華和Heidi是否同枱而坐?Bob說:「見到唔喺一枱,但佢哋返落台後,都有坐低飲杯嘢,希望佢哋好好處理番,現場賓客都想佢哋喺番一齊。」不過,昨日記者問洗米嫂會否原諒老公出軌,心軟答應復合不離婚?洗米嫂只表示:「唔回應。」
採訪:鍾國仁、皓騫、唐如

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載