› 選擇地區
三藩市
紐約
洛杉磯
其他美國地區
香港 台灣 北美
 
2016年06月21日

【馮仁昭四圍超】
「一個人去食雲吞麵」
麻利復工重返正軌

迷戀商台DJ鄧慧妍(麻利)嘅27歲陳姓的士司機,上周一晚喺九龍城茶餐廳打傷商台三個男DJ,當中包括甩骹兼穿頭嘅唐劍康(當奴),陳姓的士司機最後連人帶車失蹤44小時後被捕,而休息咗一星期嘅麻利噚日正式復工仲同傳媒見面,着住民族裙嘅麻利睇嚟精神奕奕。
麻利話案件已進入司法程序,所以唔方便講太多。問佢𠵱家仲會唔會好驚?佢話:「唔驚喇!因為知道佢喺邊度,𠵱家有相熟司機車我。」
雖然已經唔再驚,但麻利諗番件事仲有心寒感覺,又話初初怕講出嚟冇人理,後來知道好多人有相同經歷。佢話:「有事真係要講出嚟,唔可以自己啃晒,之前會驚人哋覺得自己唔係高,又唔係好受歡迎同生得靚,但其實呢啲事係冇原因,好多謝同事之前陪我同信任。」
今次當奴遇襲受傷,麻利坦言感到難受,覺得累咗其他人,因為大家都好無辜。問佢有冇叫公司加強保安?麻利就讚保安已經好好,佢每次離開電台都會幫佢先睇睇有冇可疑車輛。麻利又笑話𠵱家自己一個人去食雲吞麵,都俾同事話佢大膽,佢笑說:「我都要回復正常生活。」

森美:見轉角有人都驚

另外,森美同小儀噚日出席一項慈善義賣活動,森美講開當奴時笑住話:「唯一對佢磨滅唔到嘅係佢喺電視上嘅包頭形象太唔有型,其實佢都驚。」之後佢又話大家嗰幾日都好緊張:「行開行埋見到轉角有人都驚,嗰幾日返工都會等埋小儀,所以影響都大。」佢又話唔知點解地球好多怨恨,希望唔好咁多戾氣。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載