› 選擇地區
三藩市
紐約
洛杉磯
其他美國地區
香港 台灣 北美
 
2016年06月23日

【add】紅人主場:強化BB 吳千語

人幾時都要進步!
23歲的吳千語近兩年狂拍戲,由人人熟知的「千語BB」,進入強化版本,以往專演千金小姐,新作《賞金獵人》有動作打戲、有折磨場口;千語式的紙板人也練出小筋肉,看似氣若柔絲,弱不禁風,但其實大膽女敢跳傘、喪滑雪踩冰,更想去南極探險。「唔好抱住一個滿足,追求更好係我一個宗旨。」

撰文:林妙萍
採訪、造型:趙潔恆
攝影:周樂恒
攝錄:林德雄、陳志嵐
髮型:Jo Lam
化妝:Zoe Fan

吳千語近期忙宣傳新作《賞金獵人》,片中飾演一個二十多歲的天才駭客美女,開拍前喪睇天才型犯罪片,「要演到自己同個keyboard好熟,打得好快,嗰排真係同部電腦friend咗。」

李敏鎬不放電

以往離不開演純情少女、千金小姐,今次有新考驗,「有一場戲係我俾人綁架,我俾鐵鏈綁喺車度,綁咗幾日,咁拍就仲耐。有槍、有綁匪,我要好驚,keep住喊,處於一個好崩潰嘅狀態好耐,精神上都幾攰。」新作和中港台多地男女星合作,韓國男神李敏鎬、內地爆紅的鍾漢良等,片場內廣東話、普通話、英語、韓語,四聲道交流。有否被男神李敏鎬電到?「佢唔係一個放電嘅人,私下嘅佢反而幾搞笑,同埋鍾意整蠱人,其實係一個幾搞怪嘅年輕人,我expect佢係一個幾靜嘅男仔,熟絡咗都幾好玩。」更大嘆連牙醫診所護士、時裝店店員,都不停八卦李敏鎬瑣事,務求見一面,「韓國Oppa嘅魅力真係太大喇!」
近年片約不斷,千語反而想拍細膩劇情片,「我鍾意啲節奏慢啲、情感比較細緻嘅電影,希望下一部戲會有啦,都希望自己演得越來越好,唔好抱住一個滿足,要追求更好。」

跳降傘去南極

千語比想像更大膽,她早前放假去悉尼,就去了跳傘,Ig上亦經常見到她滑雪、溜冰的相片分享,「其實我好細個跳過,完全唔驚!跳之前,教練問我ready未,我都未答佢,佢已經跳咗落去。嗰刻感覺真係好free、好放鬆,人生好少時候可以完全唔諗嘢。由搭飛機上天,到跳落嚟,都唔諗嘢,因為諗唔到嘢。」
現正搵伴一齊挑戰笨豬跳,也想去南極,「我幾鍾意冒險,希望可以去南極,去浸冰水、喺冰湖上面釣魚。我未睇過北極光,都好想去,以前試過喺結冰嘅湖上面溜冰。但要揹住個同我一樣重嘅背包,因為背包太重,我隻腳承受唔到咁重,玩唔到,希望身體再強壯啲,下次再去過。」自爆近期愛上攝影,更會拎部相機影山影水,「電話影相少咗好多質感,不過香港生活已經好忙碌,唔夠時間影相。」

練線條不節食

對比前幾次專訪,吳千語的身形明顯強壯了,有肌肉線條,「我做運動係為自己健康多啲,唔係想要更加瘦。好多人問我點減肥,其實我一啲都唔會減肥,只係想強壯啲、健康啲。」自覺血壓偏低,正努力行山做gym、放狗拉筋,樣樣做,飲食亦有自己一套簡單邏輯,「我冇節食,但如果一餐係食junk food、油膩,好似漢堡包、薯條,咁下一餐就會食多啲菜。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載