› 選擇地區
三藩市
紐約
洛杉磯
其他美國地區
香港 台灣 北美
 
2016年06月27日

【港人畫海底奇兵2】
愛民邨走到荷李活 Pixar動畫師:香港冇得發揮!

上集講到蘋果記者帶大家去Pixar總部行咗轉,搵到兩位喺彼思工作超過十年嘅香港人-動畫師Anthony Wong同畫家Maria Lee,兩位都有份參與嚟緊上映嘅《海底奇兵2》,佢哋同大家分享喺Pixar創作經歷,仲會話你知面試會問咩添。

記者:黃芷蔚 攝影:廖達燊

胡迪「爸爸」自製笑位氹人開心

Anthony Wong擔任Pixar動畫師12年,負責角色動作及故事板,畫過《反斗奇兵》、《怪獸公司》、《反斗車王》、《五星級大鼠》等,設計胡迪動作時諗爆頭,於是呢位胡迪「爸爸」就搵同事攞靈感,「胡迪有時扮牛仔呀嘛!牛仔啲嘢唔係香港人(所熟悉),所以我搵人問,佢哋一整啲動作啲牛仔嘢就出嚟,我就照住佢嚟做。」當設計好短時間嘅畫面時,Anthony鍾意自加笑料,因為見到觀眾笑得好開心,佢就好滿足。「《五星級大鼠》入面我做嗰個衛生局局長畀人擲去雪櫃嗰段,啲人睇到會好有反應,我好鍾意做咁樣細細嘅場面,因為我好鍾意睇周星馳啲戲。」

專門幫角色立體化嘅Maria Lee,最近喺Pixar渡過佢第一個十年,辦公室枱上擺住巴斯光年外型嘅十周年獎座。佢話除咗《反斗車王2》同《玩轉腦朋友》,其餘十五部動畫都有參與。Maria仲即席幫《海底奇兵2》Destiny一角上色,「全部角色已經在美術部設計過,話呢條魚係咁嘅樣,條脷係咩顏色,佢個肚係有咩質地。最難就係做到反光,好似呢度唔夠滑就唔似條魚。」

「將香港talent擺呢度,就飆得好快。」

見到Anthony同Maria今日嘅成就,好難想像佢哋經歷過迷茫階段,「我嗰陣時就全世界讀工程師,我就跟住一齊讀,我冇諗過自己要做乜架,之後先發覺原來鍾意畫嘢。」Anthony形容當個世界忽然多咗好多顏色,掂咗動畫更加係就冇得返轉頭。之不過喺迪士尼畫足十年,手畫動畫突然要全電腦化,佢喺一夜之間失業,「成個部門冇咗,嗰時我準備結婚又啱啱遇到911,都幾低潮。」好在佢話香港人夠靈活識執生,喺Pixar邊做邊學,成為今日動畫專才,「我喺香港見到啲朋友,或者睇啲港漫,我覺得佢地受環境影響冇得完全發揮,你將香港talent擺呢度,就標得好快。」

住過愛民邨,小學移民到美國嘅Maria,第一個要面對就係語言問題,「逼住學英文,不停讀書。經常要fight點樣去do the best。」佢話以前好擔心人哋話佢有口音,依家就覺得識第二語言係優點,仲會反問人:「不如你試吓講中文?」

面試要活潑易相處

佢哋話喺Pixar做嘢好開心,而且好少OT,亦都見過好多有才華嘅後生仔想加入,但Pixar要求又點只咁簡單呢?Maria話:「我都試過in新人,好容易去搵一個有才華嘅人,但要搵一個有才華同時易於相處嘅人,有時會更難。」Anthony就表示除咗作品外,Pixar會睇你個人反應,活潑啲、想象力多啲就更好,聽到未?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載