› 選擇地區
三藩市
紐約
洛杉磯
其他美國地區
香港 台灣 北美
 
2016年07月05日

子華神之謎
解構棟篤笑預言書

子華開騷了,但不是棟篤笑,是跟陳法拉合演舞台劇《前度》,探討現代愛情觀,題材嚴肅,不談政治,唔搞笑。雖然舞台劇加場加場再加場,反應熱烈到不得了,但睇睇討論區留言,網民最想睇嘅,始終係子華神嘅棟篤笑,畢竟棟篤笑實在太「神」。
認真一問,點解子華神叫做子華神呢?其一說法,就係子華喺棟篤笑講過嘅笑話,十居其九都會變成事實。換以言之,一係佢係神的化身,能主宰一切;一係佢就係大預言家,世事早被他看透。究竟佢歷年嘅棟篤笑入面,講中咗幾多樣嘢?等我哋為大家解構。

預言一:特事特辦犯眾怒

「點解今時今日香港會搞成咁呀,各位?因為有條友睇咗《低B做特首》囉!」——《冇炭用》(2003)
你可以話佢當年寸緊董建華,但我地今日嘅特首,都唔見得頭腦精明好多,一單原本好濕碎嘅遺漏行李事件,因為有人疑濫用特權,演變成為國際新聞。香港人要聽命這一男子,自求多福了。

預言二:愛國人士頻獻媚

「我係絕對唔會懷疑有一日,我地能夠全民轉軚親中嘅能力。」——《秋前算賬》(1997)
子華神在《兒童不宜》說過,「呢個世界一切事物,不外乎利益兩個字。」所以,你也不需要懷疑一干「愛字頭」的團體有幾真心。搵食啫,犯法呀?係咪咁話。

預言三:一國兩制瀕崩解

「過咗九七,香港唔會再有被動嘅嘢出現,所有嘢都好主動,債主唔需要追債,債仔自動回歸。」——《秋前算賬》(1997)
有一期香港興起「被乜乜」、「被物物」,誰想到近日連「被失蹤」都有。銅鑼灣書店的李波,疑在非情願的情況下被捉返內地,事後還要發聲明指用「自己的方式」返大陸協助調查,當中疑涉及公安跨境執法,一國兩制變相形同虛設。

預言四:死先有得做業主

家即管放心去死,死咗就有業主做嘞!」——《末世財神》(1994)
樓價高企唔係今時今日嘅事,就算你唔去日本唔去睇戲,大部份打份牛工嘅都係一樣買唔到樓,公屋就更加冇你份。子華神呢番說話當然係講笑,不過係咪死咗就做到業主呢?其實都好值得懷疑,依家寶福山一個骨灰位動輒幾十萬,真係窮人免問。

預言五:十年之後有十年?

「經過呢十年,有邊個估得到自己可以過得到呢十年呢?同埋過多十年會變成點呢?」——《拾下拾下拾年棟篤笑》(1999)
只要係香港人,都會感受到呢十年轉變得太快,社會撕裂、中港矛盾、官商勾結、新聞自由被扼殺。政治敏感的電影《十年》,更被無理封殺,誰能料到香港十年後會變成點?

子華唔搞棟篤笑嘅原因,係因為香港呢幾年根本笑唔出。唔通佢已經預示到香港會有排衰?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載