› 選擇地區
三藩市
紐約
洛杉磯
其他美國地區
香港 台灣 北美
 
2016年07月13日

【馮仁昭四圍超】親身上陣槍戰戲 
古天樂玻璃碎入眼

導演杜琪峯、游乃海聯合監製,趙薇、古天樂同埋鍾漢良等演出嘅電影《三人行》聽日上映。今次古仔飾演追捕悍匪鍾漢良嘅警察,其中一場講述鍾漢良喺醫院逃走,由高處墮下受傷,古仔基於警察救人天職所以最後都要救佢。
嗰場戲講古仔一手捉繩索一邊落手銬捉鍾漢良,至於用嚟救命嘅消防喉忽然下墮,認真驚險。事實上拍攝背後都係好驚險,鍾漢良因為要長時間倒吊充血,搞到塊面第二日爆微絲血管,但點傷都唔夠古仔差啲盲眼咁慘。

趙薇虛脫

話說古仔有場同鍾漢良互相開槍戲,仲有玻璃破裂場面,古仔話:「拍完之後好似覺得有啲玻璃入咗眼,我用水洗,過咗四、五日再去睇醫生,要挑起眼皮攞番啲玻璃碎出嚟,醫生話都好彩係幾日,如果唔係會割傷眼球角膜。」唔好以為淨係兩位男主角辛苦,其實趙薇喺倒吊嗰場戲要拉住條消防喉救兩位男主角,之後佢都話好似虛脫咁。
另外,今個暑假檔古仔有多部戲同時上映,其中《使徒行者》日前拍攝海報,演卧底釘姐嘅佘詩曼有多款揸槍造型。阿佘戲中又會同上司吳鎮宇有曖昧,不過鎮宇話拍之前話會有激咀戲,點知出嚟效果俾電視劇仲保守。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載