› 選擇地區
三藩市
紐約
洛杉磯
其他美國地區
香港 台灣 北美
 
2016年07月15日

【馮仁昭四圍超】讚王宗堯用眼神交戲
達哥:令我有感覺

達哥話估唔到(左起)王宗堯、周家怡同楊淇演戲可以演得咁穩。

王宗堯、周家怡、吳孟達(達哥)同楊淇早前喺新蒲崗一間酒店接受訪問,幫主演嘅電影《導火新聞線》宣傳。達哥話差不多有兩年冇拍港產片,對上一套係彭浩翔導演嘅《香港仔》。達哥大派高帽話估唔到呢幾位演員可以演得咁穩:「內地演員同我拍戲,佢哋都好有戒心、好緊張。反而佢哋(宗堯、家怡同楊淇)完全冇呢種心態,熟讀劇本個人信心大好多。」

「張家輝唔敢望我」

達哥又大爆張家輝同張衞健嘅秘密,仲賣口乖讚宗堯:「有場戲喺街拍,有路人、有粗口,佢都拍得好穩,成個成熟嘅劉德華咁。印象特別深刻嘅係佢同我有眼神交流,唔容易做到,而且可以令到我有感覺,張家輝同張衞健都唔敢望我。」達哥話好多人唔敢同佢用眼神交戲,佢話:「真㗎家輝咁講呀,話『達哥你唔好畀呢啲眼神,我頂唔住呀』,佢唔敢要我啲眼神,佢哋會避開㗎。」
宗堯話可能成日冇份拍都去現場睇達哥做戲,宗堯話:「可能係咁熟絡咗,冇咁怯場。」楊淇同家怡就話同達哥冇乜嘢對手戲,但係都成日去片場偷師。
場地提供:香港九龍貝爾特酒店
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載